﻿SALMOS.
97.
Nak X̱anžon' Benne' Wnná Bia' Ẕen. ¡Le yebele, ḻe'e zoale yežlyó! ¡Le yebele, ḻe'e zoale žoa'a nisdo'! 
Zej nyechjle bejw, na' da' choḻ Ḻe'. Ḻo da' naken dot da' li, na' da' chawe' ẕnna bi'e. 
Ẕnežw yi' gan žeje' Ḻe', da' wzeyen benne' ka' bi ẕḻé'egekle' Ḻe' chawe'. 
Yes wzió' chie' ka' žsa'ní'gaken yežlyó. Yežlyó nga ẕḻe'elen, na' žẕon'. 
Želángak ya'a ka' ka china' bez ḻaw X̱anžon', ḻaw X̱angak benne' ka' nníta'gake' dot yežlyó nga. 
Ẕḻoe'e ḻaw ya'abá da' chawe' chie', na' benne' yógo'te yež ẕḻé'egekle' yeḻa' ẕen chie'. 
Yedoé'egekle benne' ka' ẕka'n ẕéngake' lo'a ka', benne' ka' ẕka'n ẕen kwíngake' ni'a chegak lo'a ka' chégake'. Yógo'te dios chegak benne' ka' wzóa ẕíbgaken ḻaw X̱anžo Dios. 
Béngekle benne' ka' nníta'gake' yež Sión, na' bebégekle'. Bebégekle benne' ka' nníta'gake' yežlyó Judá, ni'a che da' bchi'a ḻažo'o Le', X̱anto' Dios. 
Ẕente nako' Le', X̱anto' Dios, ḻawle dot yežlyó. Ẕenže nako' Le' ka yógo'te dios chegak benách ka'. 
Nol-le ḻe'e nží'ilele X̱anžon', le ža'a da' ẕinnj. Ḻe' žape chi'e yeḻa' nban chegak benne' chie' ka'. Žeslé' ḻégake' ḻo na'gak benne' wen da' ẕinnj ka'. 
Yeḻa' baní' chie' zóaḻenen benne' chawe' ka', na' yeḻa' žebele chie' zóaḻenen benne' ḻi ḻaže' ka'. 
Le yebele ḻe'e, benne' chawe' ka', ḻaw X̱anžon'. Le wsá' ḻaže' da' ẕen da' ben Dios, na' le wká'n ẕen La la'y chie'. 
