﻿SALMOS.
99.
Nak X̱anžo Dios Benne' Wnná Bia' Ẕen, na' žẕízegak yógo'te benne' ka' ni'a chie' Ḻe'. Ži'e latje blo chie' dan' zoan ḻáwlegak kerubín ka', na' žẕo' yežlyó nga. 
Ẕente nak X̱anžon' ḻaw Ya'a Sión. Nake' ẕen ḻáwlegak yógo'te yež ka'. 
Le wká'n ẕen La la'y che X̱anžon' da' naken ẕen, na' da' žaḻa' žébežo. La'y nake' Ḻe'. 
Le', Benne' Wnná Bia' Ẕente, nži'ilo' da' nak chawe'. Bzoa chocho' da' naken dot da' li. Beno' da' naken chawe', na' da' naken dot da' li ni'a chegak ẕa'só Jakob ka'. 
¡Le wká'n ẕen X̱anžo Dios! ¡Le wzóa ẕible ḻawe' Ḻe' gan ži'e ẕnna bi'e dan' nake' la'y! 
Moisés, na' Aarón gókgake' bx̱oz chie' ka'. Samwel goke' to benne' bcháḻjḻene' Ḻe'. Wnnábgekle' X̱anžo Dios to, na' Ḻe' bechebe'. 
Bcháḻjḻene' benne' ka' to ḻo bejw gasj. Béngake' da' wnnakze' Ḻe', na' da' bchi'le' ḻégake'. 
Le', X̱anto' Dios, bechebo' chegak benne' ka'. Bḻoe'elo' ḻégake' nako' Dios, na' ženít ḻawo'o Le' chegak benne' ka', ḻa'kze žono' ga ẕzáka'gake' ni'a che doḻa' da' nbága'gake'. 
¡Le wká'n ẕen X̱anžo Dios! ¡Le wzóa ẕible ḻawe' Ḻe' ḻaw ya'a la'y chie', dan' la'y nak X̱anžo Dios! 
