﻿SALMOS.
102.
X̱ana' Dios, benle da' ẕnnabla' Le', na' bze nag da' žḻiža' Le'. 
Bi wkache' ḻawo' Le' ḻawa' neda', dan' že' zedla'. Bze nag chia', na' bechebe chia' kate' žḻiža' Le'. 
Nak yeḻa' nban chia' ka žen che yi' da' ẕnitlen. Yo'o da' ḻa ḻo žit chia' ka to yi' da' žáḻa'ḻe'en. 
Žedó ḻaža'a, na' nak ḻáẕda'wa' ka to yix̱e' nkwaden, na' biž ẕnnan gawa' yet. 
Dan' ẕbeže wé'ḻi'a ba nžítḻi'a. 
Naka' ka to lab ẕlaba' to ḻo yežlyó biž, na' ka to bedkoke žíaba' ḻawle to yo'o nyinnj. 
Žata'a yele, san bi ẕtasa'. Naka' ka to byinne žíaba' tozba' yichjo'o sibe. 
Tža tža ẕnne zí'tezgak benne' ka' bi ẕḻé'egekle' neda' chawe'. Benne' ka' ẕžá'agake' neda' ẕkóngekle' žin la' kate' ẕnne zí'gake' che no benne'. 
Kate' žawa' yet, naken ka žawa' de, na' nis ẕbeža' nchix̱en da' že'ja'. 
Ki žaken dan' ẕžo'o neda', na' žsaka' zi'o neda'. Bkwaso' neda', na' bžo'no' neda'. 
Nak yeḻa' nban chia' ka to ẕoḻ da' ẕdezen, na' naka' ka to yix̱e' da' ba nbižen. 
Le', X̱ana' Dios, to chi'ize zo'. Chejsá' ḻáže'gak yógo'te benách ka' La la'y chio'. 
Bezó ža', na' beyache' ḻaže'l benne' yež Sión ka', dan' ba bžin ža yenít ḻawo'o chégake'. 
Neto', wen žin chio', nži'ilto' yej ka' che yežen'. Žékelto' zi' dan' nbia yin'. 
Benne' yógo'te yež ka' gápegake' La la'y chio' ba la'ne, X̱anto' Dios. Žébegak yógo'te benne' wnná bia' ka' yeḻa' ẕen chio', 
kate' yechiso' yež Sión, X̱anto' Dios, na' ḻé'egekle' yeḻa' ẕen chen, 
dan' wzé nago' da' ẕnnábgekle benne' ka' wléj yichjo' na' biž wzó' cheḻa'ale da' žáta'yoegekle' Le'. 
Bzoj da' ni nich góḻgaken benne' ka' za' ḻá'gake', na' benne' ka' za' gáljgake' we ḻáwgake' X̱anžo Dios. 
Gan zoa X̱anžon' ya'abá bwie'. Gan zoe' ya'abá bḻe'ele' yežlyó nga, 
nich yenle' chegak benne' ka' ẕbeže nyáche'gake', benne' ka' zej nyejwe' liž ya, na' yeslé' benne' ka' ba nžog chégake' gátgake', 
nich wzéngekle' benne' yež Sión ka' kan nak ẕen La la'y che X̱anžo Dios, nich we ḻáwgake' Ḻe' ḻo yež Jerusalén, 
kate' ḻa'gak benách yógo'te yež ka', nich wká'n ẕéngake' X̱anžo Dios. 
X̱anžo Dios bzex̱jwe' yeḻa' waḻe chia', na' yeláte'ze ka bete' neda'. 
Naž wnnía': “Dios chia', bi goto' neda', kate' bi na' gola'. Le' to chi'ize zo'.” 
Ža ni'te bzo' yežlyó nga, na' ḻen no'o beno' ya'abá. 
Kwia yi'gak da' ka', san sóatezo' Le'. Te chegak yógo'te da' ka' kan žeywé to laže'. Kan ẕcha'to' ẕato' žeza', wchó'o da' ka', 
san bi ẕcha' kwino', na' batkle te chio'. 
Gape chi'o ẕi'nto' neto', benne' wen žin chio' ka', na' wzóa chochkzo' ẕa'sóto' ka' ḻawo' Le'. 
