﻿SALMOS.
103.
We ḻawa' X̱anžo Dios ḻen dot yichj ḻáẕda'wa'. We ḻawa' La la'y chie' ḻen dot da' naka'. 
We ḻawa' X̱anžon' ḻen dot yichj ḻáẕda'wa', na' bi gaḻ ḻaža'a da' chawe' da' bene' chia'. 
Ženít ḻawe' yógo'te doḻa' da' nbaga'a. Žeyone' neda' chegak yógo'te yižwé' ka' da' yoa'a. 
Žape chi'e neda' nich bi gata'. Ḻo yeḻa' ži'i ḻaže' chie', na' yeḻa' žeyache' ḻaže' chie' ẕka'n chawe'e neda'. 
Ẕzanḻi'e da' chawe' ka' da' žákgaken chia' nich yeyaka' ka to benne' yiz kwide', na' benne' waḻe kan žak che to bsia. 
X̱anžo Dios ẕchi'a ḻaže'e da' žak chegak benne' ka' ẕzáka'ḻe'egake', na' ẕka'n chawe'e ḻégake'. 
Bḻoe'ele' Moisés da' ka' wló'o ḻaže'e gone', na' bi'e latje benne' Israel ka' bḻé'egekle' da' ẕen ka' da' bene'. 
X̱anžon' žeyache' ḻáže'le', na' nži'ile' benách ka'. Nake' ẕen ḻaze', na' nží'iḻe'ele' benách chie' ka'. 
Bi ẕtiḻkze' žo'o, na' kegé to chi'ize ẕže'e žo'o. 
Bi žebi'e chežo ka nak ẕia da' nbága'žo, na' bi na' wžía yi'e žo'o ni'a che x̱tóḻa'žo. 
Ka nak sibe ya'abá ḻawle yežlyó, kikze nak yeḻa' ži'i ḻaže' ẕen chie' ḻen benne' ka' žápegake' Ḻe' ba la'ne. 
Ka nak zi'to' gan ẕḻa' wbíž, na' gan ženen, kikze ẕkwase' zíto'le doḻa' da' nbága'žo. 
Kan nak x̱a x̱kwide' ka' ži'i ḻaže' ḻen ẕi'nkze' ka', kikze nak X̱anžon' ži'i ḻaže' ḻen benne' ka' žápegake' Le' ba la'ne. 
Ḻe' nnézkzele' kan nakžo ḻo beḻa' žen chežo. Žejsá' ḻaže'e nakžo bix̱te yo. 
Ka nak yeḻa' nban chežo, nakžo ka to yix̱e'. Ẕgolžo ka žak che to yeje yix̱e'. 
Kate' ẕde be' ga na', na' ẕnitlen, na' biž zoa no benne' žejsá' ḻaže'e chen, 
san ka nak chegak benne' ka' žx̱en ḻáže'gake' X̱anžon', yeḻa' ži'i ḻaže' chie' zóaḻenen ḻégake' to chi'ize, na' da' chawe' chie' zóaḻenkzen yógo'te ẕa'sógake', 
benne' ka' žóntezgake' kan ẕnna diža' dan' bénḻene' ḻégake', na' benne' ka' žóngake' kan wnnakze' Ḻe'. 
Bzoa X̱anžon' latje chie' ya'abá gan ži'e ẕnna bi'e. Nakkze' Benne' Wnná Bia' Ẕen ḻáwlegak da' zej den. 
Le wká'n ẕen X̱anžon', ḻe'e, wbás che ya'abá ka'. Nakle wbás waḻe, na' chochḻe'e, na' žonle kan ẕnne', na' ẕze nagle da' ži'e ḻe'e. 
Le wká'n ẕen X̱anžon', ḻe'e, wbás che ya'abá ka' žejle ḻo wdiḻe. Nakle wbás wen žin chie' ka', na' žonle kan žénele' Ḻe'. 
Le wká'n ẕen X̱anžon', yógo'tele ḻe'e, ben Dios ḻe'e, na' zoale yógo'te latje gan ẕnna bi'e Ḻe'. We ḻawa' X̱anžon' ḻen dot yichj ḻáẕda'wa'. 
