﻿SALMOS.
104.
We ḻawa' X̱anžo Dios ḻen dot yichj ḻáẕda'wa'. Ẕente nako' Le', X̱ana' Dios. Laže' da' nako' naken yeḻa' x̱tan, na' yeḻa' ẕen. 
Ẕwakw kwino' yeḻa' baní' ka ẕa lano'. Bzaḻo'o ya'abá ka to yo'o laže' chio'. 
Beno' ližo' ḻawle nis da' žen' ža'le. Ẕkonlo' žin bejw ka' ka to karreta gan ži'o Le', dan' ẕden ḻo be'. 
Ẕkonlo' žin be' žaken ka wbás chio', na' yes wzió' ka' ka wen žin chio' ka'. 
Bzoa chocho' yežlyó nga ḻo lenen, na' bi be gak wkwasen'. 
Bwako' yežlyó nga ḻen nisdo' ka žon to benne' žakwe' ẕa lane', na' nisen' bwakwn ya'a ka'. 
Kate' btiḻo' nisen', na' beẕonnjen. Bebigan' kate' benlen wnnó' zižje. 
Nisen' dan' bwakwn ya'a ka' bejsóan ḻo yegw ka', na' bžinen latjen' da' beno' Le' che nisen'. 
Bzo' gan ze ḻaw chejsóan, na' gan biž gak ten, nich biž yewakwn yežlyó bižen'. 
Beno' bej ka', da' ka' žáljgaken žoa'a yégodo' ka', na' yegw ka' ẕdégaken ládjwgak ya'a ka'. 
Ḻo yegw ka' že'jgak bia yix̱e' ka' nis, na' ẕdoan yeḻa' ẕbiḻe nis chegak burro yix̱e' ka'. 
Byínnedo' ka' žóngakba' x̱ó'ngakba' ka' ḻo yag ka' zégaken žoa'a yegw ka', na' žóḻgakba' ládjwgak ni'a ná'gaken ka'. 
Žseḻo'o yejw ẕan ya'abá dan' žaken ḻaw ya'a ka', na' želje yežlyón' ḻen da' chawe' da' žono'. 
Žesgolo' yix̱e' da' žawgak bia yix̱e' ka', na' kwando' ka', da' ka' žawgak benách ka', na' da' ka' ẕkóngekle benne' ka' žin nich góngake' yeḻa' waw, 
na' uba ka', da' ka' žóngake' x̱is uba waḻ dan' žonen ga žebégekle benne' ka', na' olibo ka', da' ka' žóngake' set dan' ẕgó'ogake' yíchjgake', na' ẕoa' da' žóngake' yet nich sóagake' nbángake'. 
Yag sedro ka' da' zej zen ḻaw Ya'a Líbano ẕzí'gaken nis yejw. Zej naken chio', X̱anto' Dios, dan' gozo' ḻégaken. 
Ḻo yag ka' žẕíagak byínnedo' ka' x̱ó'ngakba' ka', na' ḻo ni'a ná'gaken že'gak liž byinne sigwenya ka'. 
Zej zoa chibo yix̱e' ka' ḻaw ya'a ẕen ka', na' ḻo bloj ka' ẕangak ya'a ka' zej zoa bẕižo' ka'. 
Beno' byo' dan' ẕḻoe'elen to byo' to byo' che yiz, na' wbíž nnezlen kate' žaḻa' yenen. 
Beno' yel, na' kate' ba goḻen, na' ẕžojgak bia yix̱e' ka'. 
Ẕbéžeya'agak bež yix̱e' ka', žíljgakba' da' gáwgakba'. Žíljgakba' bia ka' wnnakzo' gáwgakba'. 
Kate' ẕḻa' wbíž, na' žeyéjgakba' ḻo bloj chégakba', gan ẕtásgakba' te ža. 
Naž ẕžojgak benne' ka', na' žjake' wen žin, na' žóngake' žin na' zejte žen wbíž. 
X̱anto' Dios, da' zante zej nak da' beno'. Ḻen yeḻa' žejní'il ẕente chio' beno' da' ka'. Nža' yežlyó nga da' ka' beno' Le'. 
Zoa nisdo' ga na', dan' naken ẕen, na' zil-ḻe'e, gan zej yo'o bia zante ka', biado' ka', na' bia ẕen ka'. 
Ḻo nisdon' zej nnita' barkw ẕen ka', na' zoa bia ẕen ḻo nisdon', bian' beno' Le', nzi' laba' lebiatán. 
Yógo'te bia ka' žx̱en ḻáže'gakba' Le', nich gonno' da' gáwgakba' kate' gaḻa' chégakba'. 
Ẕneẕjon' chégakba', na' ẕzí'gakban'. Žónnḻi'o da' žáwgakba', na' žéljgeklba'. 
Kate' bi žape chi'o ḻégakba', na' ẕžébegakba'. Kate' žekwaso' be' žeká'gakba', na' žátgakba', na' žeyákgakba' bix̱te yo, 
san kate' žeseḻo'o be' chio', na' žebángakba'. Ẕneẕjo' yeḻa' nban kob chegak da' ka' zej zoan ḻo yežlyó nga. 
To chi'ize ga'n ẕen X̱anžo Dios. Žaz ḻaže' X̱anžon' da' ka' benkze' Ḻe'. 
Ẕwie' yežlyó nga, na' žẕon'. Ẕgane' ya'a ka', na' ẕžoj žen che yi' ga na'. 
Goḻkza' che X̱anžon' x̱ak zoa' nbana'. Yógo'te ža zoa' nbana' goḻa' da' we ḻawa'a Dios chia'. 
Žak ḻaža'a chaz ḻaže' X̱anžon' da' ka' ẕlab ḻaža'a, na' žebézela' ni'a che X̱ana' Dios. 
Kwia yi'gak benne' doḻa' ka' nníta'gake' yežlyó nga, na' biž soagak benne' ka' ẕbej yíchjgake' Dios. We ḻawa' X̱anžo Dios ḻen dot da' naka'. ¡Ga'n ẕen X̱anžon'! 
