﻿SALMOS.
105.
¡Le wká'n ẕen X̱anžo Dios! ¡Le wká'n ẕen La la'y chie'! Le wzenle benne' yógo'te yež ka nak da' ẕen da' bene'. 
¡Le goḻ chie'! ¡Le goḻ da' wká'n ẕenle Ḻe'! ¡Le wcháḻj chegak da' ẕente ka' da' bene'! 
¡Le yebele ḻo da' nak chie' Ḻe'! Yógo'te benne' ka', benne' žápegak X̱anžon' ba la'ne, žaḻa' yebéḻe'egekle'. 
Le nnable X̱anžon' gákḻene' ḻe'e. Tža tža le wx̱én ḻaže' X̱anžo Dios. 
Ḻe'e, ẕa'só Bran, wen žin che X̱anžon', na' ḻe'e, ẕa'só Jakob, bennen' wžíe', le wsá' ḻaže' chegak yeḻa' wak ka', na' da' ẕente ka' da' bene' Ḻe', na' kan bchi'a ḻaže'e ḻe'e. 
Ḻe' nake' X̱anžon', na' Dios chežo. Ḻe' ẕnna bi'e benne' ka' nníta'gake' dot yežlyó. 
Ḻa'kze te chegak to mil kwe' benne' ka', batkle gaḻ ḻaže'e da' wchebe ḻaže'e gone' ḻo diža' da' bene', 
dižan' da' bénlene' Bran, dan' bzetj kwine' katen' bi da' bchebe ḻaže'e gone' che Isaak, 
na' bzoa chochen' ka to da' wnnakze' gon Jakob, dižan' da' žaḻa' góntezegak benne' Israel ka' ka ẕnnan, 
dan' bene' katen' wnné': “Chele ḻe'e gonna' yežlyó chegak benne' Kanaán ka', dan' gaken to da' wdele ḻo na'gak ẕa'sóle ka'.” 
Katen' wnníta'gake' nbabze benne' ka', na' wdágake' ḻo yežlyó nga ka benne' zi'to' ka', 
na' wdégake' to yež yetó yež, na' to yežlyó yetó yežlyó, 
bi be' Dios latje no benne' bi da' gone' chegak benách chie' ka', na' ni'a chégake' btiḻe' benne' wnná bia' ka'. 
Gože' ḻégake': “Bi be gonle chegak benne' ka' wžía', na' bi gonle ẕia benne' ka' ẕcháḻjgake' ḻo wlaza' neda'.” 
Bene' ga gota' to wbín ḻo yežlyón', na' beké'e yógo'te da' gáwgake', 
san bseḻe'e to benne' wnežwe' ḻáwgake', bennen' nake' Jwsé, bi' na' béte'gake'-be' nich gakbe' bi' ndo'w che to benne' zi'to'. 
Bséjwgake' ní'abe' ḻo yežw ka' ladjw blag ka', katen' bséjwgake'-be' liž ya ḻo yežlyó Egipto, 
na' zejte goḻa' gok li da' wnná Jwsé žaḻa' gaken. Ki goken, bḻoe'el x̱tiža' X̱anžon' wnnabe' da' li. 
Naž benne' wnná bia' che yežlyó Egipton' bseḻe'e to benne' bsane' Jwsé na'. Bennen' ẕnna bi'e yež zan bsane'-be'. 
Bzoe'-be' nich gakbe' x̱angak benne' ka' nníta'gake' liže', na' nich nna bia'be' yógo'te da' nape' ḻe', 
na' nich tiḻbe' benne' ẕen ka' che benne' wnná bian' ka žaz ḻáže'kzbe', na' nich wzejni'ilbe' benne' gole ka' che yežlyó Egipton' nich gákgake' benne' sina' ka'. 
Wdé na' bžingak benne' Israel ka' ḻo yežlyó Egipton', na' wzóa Jakob ḻo yežlyó chegak ẕa'só Kam ka'. 
Wyánḻe'egak benne' ka' che X̱anžon' ḻo yežlyón', na' bene' ga gókgakže' waḻe ka zej nak benne' ka' bi bḻé'egekle' ḻégake' chawe'. 
Ben Dios ga bža'agak benne' Egipto benne' chie' ka', na' béngake' benne' wen žin chie' ka' ẕia. 
Bseḻe'e Moisés, wen žin chie', ḻawgak benách chie' ka' tẕen ḻen Aarón, bennen' wžíe' Ḻe'. 
Dios bi'e benne' chope' ki latje béngake' yeḻa' wak ka' che ya'abá, na' yeḻa' wak ẕen ka' ḻo yežlyó chegak ẕa'só Kam ka'. 
Bseḻa' Dios to da' choḻ dan' bwakwn dot yežlyón', san benne' Egipto ka' bi béngake' da' wnnakze' Ḻe'. 
Naž bene' ga beyák nis yegw chegak benne' ka' žen, na' bete' yógo'te bel ka' zej zoaba' ḻo yegw ka'. 
Besché'e yežlyó chégake' blož ka' ga bžinte wnníta'gakba' ḻo liž benne' wnná bian'. 
Wnnaze Dios, na' bḻa'gak zante bi'a che bež ka', na' bi'a las ka' dot ḻo yežlyó chegak benne' ka'. 
Ḻo wláz nis yejw bseḻe'e yej nis ḻo yežlyón', na' ḻezka' yi' da' bzeyen dot yežlyó chégaken'. 
Bchinnje' yógo'te lba uba, na' yag higo chégake' ka', na' bdichje' yógo'te yag ka' zej zen ḻo yežlyón'. 
Wnnaze', na' bḻa'gak biche' zo ka', bia ka' bi gak no benne' wlabe' ḻégakba', 
na' bdáwgakba' dot yix̱e' ya'a ḻo yežlyó chégaken', na' bdáwgakba' dot linne da' žonn yežlyón'. 
Naž bete' bi' byo nežw ka' chegak benne' Egipto ka', x̱kwide' ka' zej nakbe' bi' wak ka' chégake'. 
Bebeje' benne' chie' ka' ga na' zej noe'e mežw plat, na' mežw oro zan. Bi wzóa no benne' ládjwgake', benne' bi zoe' chawe'. 
Bebégekle benne' Egipto ka' katen' bžójgake' ga na', dan' bžébeḻe'egake' ḻégake'. 
Bzaḻa' Dios to bejw da' wló'on benne' chie' ka' ẕoḻ, na' to yi' da' bsa'nín' ḻégake' žel. 
Wnnábgekle' Dios, na' bseḻe'e bežjw yix̱e' ka' nich gáwgake'-ba', na' bene' ga béljegekle' yet da' bžojen ya'abá. 
Bsaljwe' to yej x̱e, na' bžoj nis da' wdén ḻo yežlyó bižen' ka to yegw nis. 
Ki ben Dios dan' bejsá' ḻaže'e diža' la'y chie' da' bchebe ḻaže'e gone' che Bran, wen žin chien'. 
Bebeje' benne' ka' wžíe' ḻo yežlyó Egipton', na' bebégekle' dan' gok yeḻa' ba nez ẕen chégake'. 
Bneẕjwe' benne' chie' ka' yežlyó chegak benne' yezika' yež ka', na' da' wdápegak benne' yež ka' beyaken chegak benne' chie' ka', 
nich gápegake' x̱tiže'e ba la'ne, na' góngake' ka nak da' wnnakze' Ḻe'. ¡Ga'n ẕen X̱anžo Dios! 
