﻿SALMOS.
106.
¡Ga'n ẕen X̱anžo Dios! Le ye' X̱anžo Dios: “Žóx̱keno'”, dan' nake' chawe', na' dan' žeyache' ḻáže'tezle' žo'o. 
¿Noẕkze benne' gak wḻoe'ele' kan zej nak yeḻa' wak ẕente ka' da' ben X̱anžon'? ¿Noẕkze benne' gak wká'n ẕene' Ḻe' kan žaḻa' gonžo? 
Ba nez ẕen naken chegak benne' ka' žóngake' da' chawe', benne' ka' žóntezgake' da' žénele' Ḻe'. 
Bejsá' ḻaže' chia', X̱ana' Dios, kate' žon chawo'o benne' chio' ka'. Da yesló' neda', nich gak ḻe'ela' 
da' chawe' da' gono' ni'a chegak benne' ka' wžío' Le', na' nich yebela' kate' gak chegak benne' chio' ka' yeḻa' ba nez, na' nich yebéḻenla' benách chio' ka'. 
Bento' doḻa' tḻebe kan bengak x̱a x̱na' wdé cheto' ka'. Bento' da' ẕinnj, na' bento' da' bi naken chawe'. 
Kate' wnníta'gak x̱a x̱na' wdé cheto' ka' ḻo yežlyó Egipton', bi blab ḻáže'gake' chegak yeḻa' wak che ya'abá ka' da' beno' Le'. Bi bejsá' ḻáže'gake' ka beyache' ḻáže'ḻe'elo' ḻégake', san bží'igake' chio' žoa'a nisdon' nzin' Nisdo' X̱na. 
San Dios beslé' benách chie' ka' nich ga'n ẕen La la'y chie', na' nich wḻoe'ele' ḻaw ka nak yeḻa' wak chie' Ḻe'. 
Btiḻe' Nisdo' X̱na na', na' bebižen. Wdegak benách chie' ka' gachje ḻawle nisdon' ḻo yo biž. 
Beslé' benách chie' ka' ḻo na'gak benne' ka' bi bḻé'egekle' ḻégake' chawe', na' bebeje' ḻégake' ḻo na'gak benne' ka' bsaka' zí'gake' ḻégake'. 
Naž nisdon' bwakwn benne' ka' bi bḻé'egekle' ḻégake' chawe'. Bi bga'n nitó benne' chegak benne' ka'. 
Naž benne' chie' ka' bejḻé'gake' x̱tiža' Dios, na' béḻgake' da' be ḻáwgake' Ḻe'. 
Ka' gaze goḻ ḻáže'gake' da' ka' bene'. Bi wlézgake' nich ḻé'egekle' da' gon Dios, 
san wzé ḻáže'gake' to da' ẕinnj ḻo latje dachen', na' béngake' ga bža'a Dios ḻe'e yix̱en'. 
Wdé na' bneẕjw Dios da' wnnábgekle' Ḻe', san bseḻe'e ládjwgake' to da' beten zángake'. 
Bgé'egekle' Moisés gan wnníta'gake', na' ḻezka' Aarón, Bennen' wžé X̱anžo Dios na'kze. 
Naž wyaljw yežlyón', na' bwakwn Datán, na' ḻezka' benne' ka' bénḻengake' Abiram tẕen. 
Naž wẕén yi' gan zej ndobe benách chie' ka', dan' bzeyen benne' wen da' ẕinnj ka'. 
Béngake' to lo'a ẕan Ya'a Horeb da' goken to bež da' naken ya oro, na' bzoa ẕíbgake' ḻaw lo'a oro na'. 
Ki bebéj yíchjgake' Dios, Bennen' zoe' ya'abá, nich wká'n ẕéngake' to lo'a oro, da' naken ka to bež žawba' yix̱e'. 
Goḻ ḻáže'gake' Dios, Bennen' beslé' ḻégake', Bennen' bene' yeḻa' wak ẕente ka' ḻo yežlyó Egipton', 
na' bene' yeḻa' wak ka' che ya'abá ḻo yežlyó chegak ẕa'só Kam ka', na' da' ka' ẕchébegaken žo'o žoa'a Nisdo' X̱na. 
Naž gok ḻaže' Dios wžía yi'e benne' chie' ka', san Moisés, bennen' wžé Dios, bzoa kwine' ḻaw Dios nich wzóa žie' yeḻa' ẕža'a che Dios, na' bene' ga bi wžía yi' Dios benne' ka', 
san bzóagake' cheḻa'ale yežlyó x̱tanḻe'e dan' gónele Dios wneẕjwe' ḻégake', na' bi bejḻé'gake' x̱tiža' Dios. 
Wnnétezgake' che Dios ḻo yo'o laže' chégake' ka', na' bi bze nággake' da' wnná X̱anžo Dios. 
Che ḻen bzetj kwine' gone' benne' ka' ẕia, gone' ga gatgak benne' ka' ḻo latje dachen', 
na' gone' ga yedoé'egekle benách chie' ka' ḻawgak benne' ka' wnníta'gake' yežlyón', na' yeslase' ḻégake' ladjw benne' ka'. 
Naž béngake' toze diža' ḻen benne' ka' ẕka'n ẕéngake' lo'a dan' nzin' Baal-peor. Bdáwgake' biado' ka' bétgake' ḻawgak dios gat ka'. 
Béngake' ga bža'a Dios ni'a che da' béngake', na' bḻa' to yižwé' ẕen da' beten zangak benne' ka'. 
Naž wzó ža' Finées, to bx̱oz, na' bete' to benne' ne žone' doḻa', na' wžé' ži yižwé' ẕen na'. 
Dan' ben Finées wẕí' Dios ka to da' žeyón chawen' benne' ka', dan' wḻoé'e ḻawn ḻawgak yógo'te kwe' benne' ka'. 
Ḻezka' béngake' ga bža'a Dios žoa'a bej nis da' nzin' Meribá, na' bi gok chawe' che Moisés ni'a che dan' béngake'. 
Ni'a che dan' béngake' gok Moisés yichj ža'a, na' wdetle ben Moisés da' kegle. 
Kate' wyó'ogake' ḻo yežlyó nga bi bchínnjgake' yež ka', kan bchi'le Dios ḻégake' góngake', 
san bénḻengake' benne' yež ka' tẕen, na' bsédgekle' góngake' ka žongak benne' yež ka', 
na' bka'n ẕéngake' lo'a ka' chegak benne' ka', dan' benen ga bžia yi' Dios benne' chie' ka'. 
Bétgake' bi' byodo' ka', na' bi' no'le chégake' ka' ḻawgak lo'a chegak be' x̱iwe' ka', 
na' bláljgake' žen chegak bi' že'ndo' ka', bi' ka' bi na' góngakbe' doḻa', bi' ka' bétgake' ḻawgak lo'a ka' chegak benne' Kanaán ka', na' gok sban yežlyón' ni'a che žen chegak x̱kwide' ka'. 
Da' ka' béngake' bka'ngaken ḻégake' sban, na' wléj yíchjgake' Dios ḻen da' béngake'. 
Che ḻen bžá'aḻe'e Dios benách chie' ka', na' bi bḻe'ele' chawe' benne' ka' zej nake' chekze'. 
Naž bdie' benne' chie' ka' ḻo na'gak benne' yež ka', na' benne' ka' ẕžá'agake' benách ka' che Dios wnná biá'gake' ḻégake'. 
Benne' ka' bi ẕḻé'egekle' ḻégake' chawe' bsaka' zí'gake' benách ka' che Dios. Bzéx̱jwgake' ḻégake' ḻo yeḻa' wnná bia' chégake'. 
Zante chi'i Dios beslé' benách chie' ka' san bží'igake' che da' ka' gože' ḻégake', na' wbága'gake' doḻa' dan' béngake' da' ẕinnj. 
Ḻa'kze ki béngake', kate' wžé' zédgekle', Dios bwie' da' wẕáka'gake', na' benle' che da' bḻížgake' Ḻe', 
na' bejsá' ḻaže'e dižan' da' bénlene' benne' ka', na' beyát ḻaže'e che yeḻa' ẕža'a chie' dan' ẕente nak yeḻa' žeyache' ḻaže' chie'. 
Ḻezka' bene' ga beyache' ḻáže'gekle benne' ka' benách chie' ka', benne' ka' bché'gake' ḻégake' zej nžeje'. 
Beslá neto', X̱anto' Dios. Bebéj neto' ladjw benne' zi'to' ka', nich wká'n ẕento' La la'y chio' Le', na' nich yebéḻe'elto' ḻo da' žoḻto' chio'. 
¡Ga'n ẕen X̱anžon', Bennen' nake' Dios chegak benne' Israel ka', ža ni'te, na' to chi'ize! Yógo'te benne' ka' žaḻa' nnágake': “Ka'kze gaken.” ¡Ga'n ẕen X̱anžo Dios! 
