﻿SALMOS.
107.
¡Le wká'n ẕen X̱anžon', dan' nake' Benne' chawe'! ¡To chi'ize nake' Benne' ži'i ḻaže'! 
Da' ni žaḻa' nnagak benne' ka' ba beya'w X̱anžon', benne' ka' beslé' ḻo na'gak benne' ka' bi ẕḻé'egekle' ḻégake' chawe'. 
Bebeje' ḻégake' ládjwgak benne' yež zi'to' ka', yež ka' zej žen' gan ẕḻa' wbíž, na' gan ženen, na' gan za' be' zag, na' gan ẕde wbíž byo' zag ka'. 
Baḻ benne' ka' wdágake' ḻe'e yix̱e' gan bi zoa nez, na' bi bžéḻgekle' yež gan sóagake'. 
Wdóngake', na' wbíḻgake', na' biž wzóa da' wx̱én ḻáže'gake'. 
Naž ḻo da' wẕáka'gake' bḻížgake' X̱anžon', na' beslé' ḻégake' ḻo da' wẕáka'gake'. 
Bnnite'e ḻégake' to nez ḻi, nich chjake' to yež gan sóagake'. 
Žaḻa' we ḻáwgake' X̱anžon' dan' beyache' ḻáže'le' ḻégake'. Bene' chégake' da' ka' žóngaken ga žebánležo. 
Ẕwe'je' benne' ka' ẕbíḻgake', na' ẕwawe' benne' ka' ẕdóngake' nich sí'gake' da' chawe' chie'. 
Baḻ benne' ka' wnníta'gake' ḻo da' choḻ, na' gan gok ẕož gátgake'. Gókgake' ka benne' zej nyejwe' liž ya gan zej nžeje' do ya, na' ẕzáka'ḻe'egake', 
dan' bží'igake' che x̱tiža' X̱anžon', na' bzóagake' cheḻa'ale da' bzejní'il Dios ẕente ḻégake'. 
Bedó ḻáže'gake' ḻo žin zi'iḻe'e da' béngake'. Bchégwgake' ẕan ywa' da' zej noe'e, na' bi wzóa no benne' gákḻene' ḻégake'. 
Naž ḻo da' wẕáka'gake' bḻížgake' X̱anžon', na' beslé' ḻégake' ḻo da' wẕáka'gake'. 
Naž bebeje' benne' ka' ḻo da' choḻ, na' gan gok ẕož gátgake, na' bzoẕje' do ya ka' da' zej nžeje'. 
Žaḻa' we ḻáwgake' X̱anžon' dan' beyache' ḻáže'le' ḻégake'. Bene' chégake' da' ka' žóngaken ga žebánležo. 
Bchinnje' dan' bséjwgaken benne' ka' da' zej naken ya bronse, na' bzoẕje' bar ya ka' da' byéchjgeklen ḻégake'. 
Baḻ benne' ka' wdá'gake' yižwé' ka', na' wẕáka'gake' ni'a che doḻa' wbága'gake', na' ni'a che da' ẕinnj ka' da' béngake'. 
Bgótgekle' da' že'j žáwgake', na' wzóagake' gátgake'. 
Naž ḻo da' wẕáka'gake' bḻížgake' X̱anžon', na' beslé' ḻégake' ḻo da' wẕáka'gake'. 
Ḻe' bseḻe'e x̱tiže'e chegak benne' ka', na' beyone' ḻégake', na' beslé' ḻégake' ḻo yeḻa' got. 
Žaḻa' we ḻáwgake' X̱anžon' dan' beyache' ḻáže'le' ḻégake'. Bene' chégake' da' ka' žóngaken ga žebánležo. 
Žaḻa' yé'gake' Ḻe': “Žóx̱keno'”, na' gótgake' bia beždo' ka' ḻawe' Ḻe', na' ḻo yeḻa' žebele chégake' žaḻa' góḻgake', na' wzéngekle' benách ka' kan nak da' bene'. 
Baḻ benne' ka' wdégake' ḻo nisdo' ḻo barkw ẕen ka', benne' ka' žóngake' žin ḻo nisdo'. 
Bḻé'egekle' da' ẕen ka' da' žon X̱anžon', da' ka' žone' ḻo nisdo', da' žóngaken ga žebánležo. 
Wnnaze X̱anžon', na' wzó ḻaw žak be' bdone', na' wyás nis ẕgó'nḻe'en ḻo nisdo'. 
Wžengak barkw ka' ka ḻaw ya'a ẕen da' naken nisdo', na' bedínngaken ḻo da' naken gže'l ḻaw nisdon'. 
Bejchégwgake' na' bejlétgake' nile bejlétgake' na'le kan žongak benne' ka' želzožle', na' da' zej nsedle' bi gókḻenen ḻégake'. 
Naž ḻo da' wẕáka'gake' bḻížgake' X̱anžon', na' beslé' ḻégake' ḻo da' wẕáka'gake'. 
Ḻe' bzoa žie' be' bdone' dan' žaken, na' wžé' ži nis da' ẕgo'nen che nisdon'. 
Bebéḻe'egekle' dan' bga'n ži nis ẕgo'nen, na' Dios bchi'e ḻégake' dot chawe' gan zjake'. 
Žaḻa' we ḻáwgake' X̱anžon' dan' beyache' ḻáže'le' ḻégake'. Bene' chégake' da' ka' žóngaken ga žebánležo. 
Žaḻa' wzéngekle' benne' ka' zej ndobe' chie' Ḻe' ka nak yeḻa' ẕen chie', na' we ḻáwgake' Ḻe' gan zej ndobe benne' gole ka', benne' ẕnna biá'gake'. 
Ben X̱anžon' ga wbižgak yegw nis ka', na' bsejwe' bej nis ka'. 
Gan goc yo ya'a beyonen' yo biž, ni'a che da' bi nak chawe' da' bengak benne' ka' wnníta'gake' ga na'. 
Gan nak yo biž beyonen' yo nis, na' yo yej beyonen' gan žaḻ nis. 
Bnnite'e benne' ka' ga na', benne' wdóngake', na' béngake' to yež gan sóagake'. 
Gózgake' yežlyón' na' bedá'gake' lba uba ka' ga na', na' bezí'ḻe'egake' linne chen. 
Dios ben chawe'e benne' ka', na' wyánḻe'egak x̱kwide' chégake' ka', na' bene' ga bgóleḻe'egak bia yix̱e' chégake' ka'. 
Kate' benne' wnná bia' ka' bsaka' zí'gake' benne' ka', na' wdetlen wnná biá'gake' ḻégake', na' béngake' ḻégake' da' ẕia, 
bka'n Dios benne' wnná bia' ka' ka'ze, na' bene' ga wdágake' ḻe'e latje dach gan bi zoa nez. 
Beslé' benne' yache' ka' ḻo yeḻa' yache' chégake', na' bzánḻi'e ẕi'ngak benne' ka' ka žangak ẕila' ka'. 
Kate' bḻé'egekle benne' chawe' ka' da' ki, na' bebéḻe'egekle', san benne' wen da' ẕinnj ka' bi be gok nnágake'. 
Benne' sina' ka' žaḻa' wláb ḻáže'gake' che da' ki, na' žaḻa' yeyónbia'gake' ka nak yeḻa' ži'i ḻaže' ẕen che X̱anžon'. 
