﻿SALMOS.
108.
Zoakze ḻáẕda'wa', Dios. Zoakze ḻáẕda'wa' nich goḻkza' da' we ḻawa' Le'. 
Bebán, be' da' nakkza', na' le yebán, ḻe'e ẕgoḻ-le da' žóḻ-ḻento' ka', na' arpa ka'. Zildo' yebankza'. 
Wká'n ẕenkza' Le' ladjw benne' chio' ka', X̱ana' Dios. Goḻkza' chio' ḻawgak benne' yógo'te yež ka', 
dan' yeḻa' žeyache' ḻaže' chio' nakžen ẕen ka ya'abá, na' da' li chio' nakžen ẕen ka bejw gasj ka'. 
¡Ga'n ẕenkzo' ya'abá, Dios! ¡Yeḻa' ẕen chio' ẕḻa' ḻawn dot yežlyó nga 
nich lagak benne' ka' nži'ikzlo' Le'! Beslá ḻégake' ḻen yeḻa' wak chio', na' bechebe chia'. 
Ḻo latje la'y chie' wnná Dios: “Yebekzla' neda'. Chisa' chele yežlyó chegak benne' Sikem ka', na' wžix̱a' chele yežlyó da' žen' kwit yegw Sukot. 
Yežlyó Galaad naken chia', na' yežlyó chegak ẕa'só Manasés. Yežlyó chegak ẕa'só Efraín naken ka to ḻapa' da' žape chi'in yichja'. Yežlyó chegak ẕa'só Judá naken gan ẕnna bi'a. 
Yežlyó chegak benne' Moab ka' naken ka to ẕiga' ya da' nžan' nis wná'a. Ḻo yežlyó chegak benne' Edom ka' cho'na' ẕela' gol. Si'a ba nez yežlyó chegak benne' Filistea ka'.” 
¿Noẕ benne' wchi'e neda' nich tíḻ-ḻena' yež zoa to ze'e sibe da' žape chi'in? ¿Noẕ benne' wchi'e neda' nich tíḻ-ḻena' benne' Edom ka'? 
¿Kege Le' wchi'o neda', Dios? Le' bzoakzo' neto' cheḻa'ale, na' bi wyéjḻeno' benne' cheto' ka', benne' ka' žjake' ḻo wdiḻe. 
Gokḻen neto' nich gak tíḻ-ḻento' benne' ka' ẕdíḻ-ḻengake' neto', dan' dáche'ze gak gákḻengak benne' ka' neto'. 
To ẕen ḻen Dios gonžo to da' ẕenḻe'e, na' Ḻe' wlage' benne' ka' ẕdíḻ-ḻengake' žo'o. 
