﻿SALMOS.
109.
X̱ana' Dios, ẕka'n ẕena' Le'. Bi ga'no' žize, 
dan' benne' ka' bi zej nake' chawe', na' benne' wen ḻaže' ka', ẕnnégake' chia' neda'. Ẕnnégake' chia' da' wen ḻaže'. 
Ḻo yeḻa' ẕža'a chégake' zej nyechjle' neda', na' ẕnnégake' chia'. Ẕdíḻ-ḻengake' neda', na' bi be bena' chégake'. 
Ḻa'kze bži'ila' benne' ka', na'a žéchjgekle' neda', na' ẕdíḻ-ḻengake' neda', san neda' ẕnnabla' Le' gon chawo'o benne' ka'. 
Ḻa'kze bena' neda' da' chawe' chegak benne' ka', žóngake' neda' ẕia. Ḻa'kze bži'ila' ḻégake' bi ẕḻé'egekle' neda' chawe'. 
Bzoa to benne' wen da' ẕinnj nich wchi'a ḻaže'e benne' ka' bi zej nake' chawe', na' ben ga soa to benne' wži'e chégake', bennen' wḻoe'ele' ḻaw ẕia da' zej nbage'e. 
Katen' wchi'a ḻaže'e ḻégake', ben ga gak bia' ẕia da' zej nbage'e. Bḻoe'el naken doḻa' da' ẕnnábgake' ḻawo' Le'. 
Ben ga gakgak nbabze ža sóagake' nbángake', na' benn che benne' yoble da' wdápegake'. 
Bka'n ẕí'ngake' ka' bi' wzebe ka', na' ga'ngak ẕó'legake' no'le wzebe. 
Ben ga gakgak ẕí'ngake' ka' benne' ẕdágakze' nich nnábgekle' no benne' bi da' gonne' chégake', na' ben ga žéḻgake' yet da' gáwgake' zíto'le gan zoa lížgake' da' nbia yin'. 
Ben ga cho'o da' nápegake' ḻo na' bennen' bsane' ḻégake' mežw. Ben ga yeka'gak benne' zi'to' ka' da' ka' béngake'. 
Ben ga bi soa no benne' yeyache' ḻáže'le' ḻégake', na' bi soa no benne' yeyache' ḻáže'le' bi' wzebe chégake' ka'. 
Ben ga kwia yi'gak ẕa'sógake' ka', na' biž soa no ẕa'sógake', bin' labe' kan légake'. 
Bejsá' ḻaže' che da' ẕinnj da' bengak x̱a x̱tó'gake', X̱ana' Dios, na' bi wsoḻo' doḻa' da' wbága'gak x̱ná'gake'. 
Bejsá' ḻáže'teze da' ẕinnj da' béngake', san biž chejsá' ḻažo'o benne' ka', 
dan' bi bejsá' ḻáže'gake' yeyache' ḻáže'gekle' ljéžgake' ka'. Bsáka'gake' benne' yache' ka', na' benne' gax̱jw ka', na' benne' ka' wẕáka'gake', na' bétgake' ḻégake'. 
Wyáz ḻáže'gake' wnnégake' chegak benách ka'. Ben ga nnégak benách ka' chégake'. Bi gok ḻáže'gake' nnábgake' gak chawe' chégake'. Ben ga bi soa no benne' nnable' gak chawe' chégake'. 
Da' ẕia da' žóngake' naken ka to da' žákwgake', dan' wyó'on ḻé'egake' ka nis da' wé'jgake', na' wyó'on žit chégake' ka set da' bdáwgake'. 
Ben ga tá'tezen ḻégake' ka to laže' yicha' da' nákwgake', na' ka to x̱páygake' da' nžejen ḻí'agake'. 
Da' ni gaken chégake' to da' yebí'i X̱anžo Dios chegak benne' ka' ẕdíḻ-ḻengake' neda', na' da' chiẕjwe' benne' ka' ẕnnégake' chia'. 
X̱ana' Dios, gokḻen neda' nich gak chia' da' chawe'. Beslá neda' dan' žeyache' ḻáže'ḻe'e'lo' benách ka', 
na' dan' ẕzáka'ḻi'a, na' žiážjela', na' žak zi' ḻáẕda'wa'. 
Ẕde chia' kan ẕde che to ẕoḻ kate' žen wbíž. Žak chia' kan žak che to biche' zo katen' ẕche' to be' ḻeba'. 
Žat ẕiba' dan' žona' wbás, na' nžítḻi'a dan' bi be žawa'. 
Naka' ka to da' žon dítjgekle'. Ẕwíagake' neda', na' ẕta yíchjgake' nich gon dítjgekle' neda'. 
Gokḻen neda', X̱ana' Dios. Beslá neda' dan' žeyache' ḻáže'lo' benách ka'. 
Ben ga gákbe'egekle' Le' žákḻeno' neda', na' Le', X̱ana' Dios, benkzo' da' ni. 
Bi be žéke'la' cha' ẕnnégake' chia', cha' Le' žon chawo'o neda'. Wzó ža', na' ben ga yedoé'egekle benne' ka' bi ẕḻé'egekle' neda' chawe', san ben ga yebela' neda', benne' wen žin chio'. 
Ben ga yedoé'egekle benne' ka' ẕdíḻ-ḻengake' neda', na' ben ga chíx̱gekle' to chi'ize. 
Dot ḻaža'a goḻkza' da' we ḻáwḻi'a X̱anžo Dios. Wká'n ẕena' Ḻe' ládjwgak benne' zan ka'. 
Ḻe' zoe' kwit ḻi ža chegak benne' yache' ka', nich yeslé' be' da' zej nakkze' ḻo na'gak benne' ka' ẕchóggake' chégake' gátgake'. 
