﻿SALMOS.
111.
Dot ḻaža'a wká'n ẕena' X̱anžo Dios tẕen ḻen benne' chawe' ka', benne' zej ndobe' chie' Ḻe'. 
Da' ẕenḻe'e zej nak da' ka' ben X̱anžo Dios, na' yógo'te benne' ka', benne' žaz ḻáže'gake' da' ka' žone' ẕlab ḻáže'gake' da' ka'. 
Yeḻa' baní', na' yeḻa' ẕen zej nžagen da' žone' Ḻe', na' to chi'ize zoa da' chawe' chie'. 
Žone' ga žejsá' ḻáže'žo yeḻa' wak ẕente da' žone'. X̱anžo Dios nake' ẕen ḻaže', na' žeyache' ḻáže'le' benách ka'. 
Ẕwawe' benne' ka' ẕžébegake' Ḻe', na' to chi'ize žejsá' ḻaže'e diža' da' bénḻene' benách ka'. 
Bḻoe'ele' benne' chie' ka' yeḻa' ẕen che da' bene'. Ẕneẕjwe' benne' chie' ka' da' zej nape benne' zi'to' ka'. 
Ḻi ḻaže', na' chawe' zej nak da' ka' žone'. Ḻi ḻaže' zej nak yógo'te da' ka' wnnakze' Ḻe'. 
To chi'ize zóatezgak da' ka' bchi'le' žo'o. Ḻo da' li, na' ḻo da' ḻi ḻaže' bene' yógo'tegaken. 
Bsele'e to benne' weslá nich beslé' benne' chie' ka'. To chi'ize bzoa choche' x̱tiže'e da' bénḻene' žo'o. Da' ẕen, na' da' ẕžébežo nak La la'y chie'. 
Nich so ḻawžo gápežo yeḻa' žejni'ile, žon byene žébežo X̱anžo Dios. Žejní'igekle binlo yógo'te benne' ka' žóngake' ka nak da' wnnakze' Ḻe'. To chi'ize žaḻa' wká'n ẕenžo Ḻe'. 
