﻿SALMOS.
112.
¡Ga'n ẕen X̱anžo Dios! Ba nez ẕen naken che bennen' ẕžebe' X̱anžo Dios, na' žaz ḻaže'e gone' da' bchi'le' žo'o. 
Ẕa'só bennen' nna biá'gake' yežlyó nga, na' gak chawe' chegak benne' chawe' ka'. 
Da' zan da' de, na' yeḻa' wnni'a zej yo'on liž bennen' na' to chi'ize zoa da' chawe' da' žone'. 
Žsa'ní' to yi' ḻo da' choḻ gan zej nnita' benne' ḻi ḻaže' ka', benne' ka' zej nake' ẕen ḻaže', na' chawe', na' žeyache' ḻáže'gekle' benách ka'. 
To benne' chawe' žeyache' ḻáže'le' benách ka', na' žsane' ḻégake' mežw. Ḻo da' chawe' ẕkonle' žin da' yo'o ḻo ne'e. 
Che ḻen bi be wkwás ḻe' ḻo latje gan zoe', na' to chi'ize chejsá' ḻáže'gak benách ka' ḻe'. 
Bi žebe' kate' yenle' žak da' bi nak chawe' che da' yo'on ḻo ne'e. Ẕga'n choch ḻáẕda'we' dan' žx̱en ḻaže'e X̱anžo Dios. 
Zoa chawe' ḻáẕda'we', na' bi be ẕžebe' na' zejte ža ḻe'ele' gak kan žak ḻaže'e chegak benne' ka' bi ẕḻé'egekle' ḻe' chawe'. 
Ẕchise' da' nape', na' ẕneẕjwe' da' gákḻenen benne' yache' ka', na' to chi'ize zoa da' chawe' da' žone'. Ga'n ẕen yeḻa' wnná bia' chie'. 
Ḻe'el benne' wen da' ẕinnj da' ni na' ge'ele ḻe'. Gáwya'ate laye'e, na' kwe' zedle'. Nitle da' ẕze ḻáže'gak benne' wen da' ẕinnj ka'. 
