﻿SALMOS.
116.
Nži'ila' X̱anžo Dios dan' benle' chi'a, na' dan' wnnabla' Ḻe'. 
Dan' bze nage' chia', che ḻen wḻiža' Ḻe' x̱ak zoa' nbana'. 
Wžé' zedla' ni'a che yeḻa' got, na' wžeba' zoa' choa'a ḻo yi' gabíl. Wžé' zedla', na' wẕáka'ḻi'a. 
Naž bḻiža' X̱anžo Dios, na' wnnía': “X̱ana' Dios, beslá be' da' nakkza'.” 
X̱anžo Dios nake' chawe', na' ži'i ḻaže'. O', Dios chežo žeyache' ḻáže'le' žo'o. 
Žape chi'ikze X̱anžon' benne' gax̱jw ḻaže' ka'. Katen' wžé' zedla' beslé' neda'. 
Ḻe' ben choche' neda', na' na'a zoa' chawe', dan' X̱anžon' žon chawe'e neda'. 
Le', X̱ana' Dios, besló' neda' ḻo na' yeḻa' got, nich biž kweže we'a, na' nich bi chejchégoa'a. 
Gona' da' ye' X̱anžo Dios neda' gan zej nnita' benne' ka' zej zoe' nbángake'. 
Bejḻi'a chie', na' bchaḻja' chie' ḻa'kze wẕáka'ḻi'a, 
na' ḻo yeḻa' ẕžebe chia', wnnía': “Zej nak yógo'te benne' ka' benne' wen ḻaže' ka'.” 
¿Biẕkze gak yebi'ikza' che X̱anžo Dios ni'a che yógo'te da' chawe' da' bene' chia'? 
Si'a ḻo ne'e Ḻe' yeḻa' weslá, na' wḻiža' La la'y che X̱anžo Dios. 
Na'a gona' da' ka' wchebe ḻaža'a ḻaw X̱anžon'. Gonan' ḻawgak yógo'te benne' chie' ka'. 
X̱anžo Dios ži'e wnné yoe ni'a chegak benne' chie' ka' dan' žátgake'. 
X̱ana' Dios, da' li naka' wen žin chio'. Naka' wen žin chio', na' ẕi'n no'le wen žin chio'. Le' bzoẕjo' da' bžejen neda'. 
Da' wká'n ẕena' Le' gaken ka to biado' da' gota' ḻawo' Le', na' wká'n ẕena' La la'y chio' Le', X̱ana' Dios. 
Ḻaw X̱anžo Dios gona' da' ka' bchebe ḻaža'a chie'. Gonan' ḻawgak yógo'te benne' chie' ka'. 
Gonan' ḻa' ḻi'a liž X̱anžo Dios dan' žen' ḻo yež Jerusalén. ¡Ga'n ẕen X̱anžo Dios! 
