﻿SALMOS.
118.
¡Le wká'n ẕen X̱anžo Dios dan' nake' chawe', na' dan' to chi'ize žeyache' ḻáže'le' žo'o! 
Žaḻa' nnagak benne' Israel ka': “¡To chi'ize žeyache' ḻáže'le' žo'o!” 
Žaḻa' nnagak ẕa'só Aarón ka': “¡To chi'ize žeyache' ḻáže'le' žo'o!” 
Žaḻa' nnagak benne' ka' ẕžébegake' X̱anžo Dios: “¡To chi'ize žeyache' ḻáže'le' žo'o!” 
Katen' wžé' zedla' bḻiža' X̱anžo Dios. Bechebe X̱anžon', na' beslé' neda' ḻo dan' bex̱wn neda'. 
Zoaḻen X̱anžon' neda', na' batkle žeba' bi da' gongak benne' ka' chia' neda'. 
Zoaḻen X̱anžon' neda', na' Ḻekze' žákḻene' neda'. Che ḻen ḻe'ela' chejchégwgak benne' ka' ẕdíḻ-ḻengake' neda'. 
Chawe' nak wx̱én ḻáže'žo X̱anžo Dios, na' kege wx̱én ḻáže'žo benne' ka'. 
Chawe' nak wx̱én ḻáže'žo X̱anžo Dios, na' kege wx̱én ḻáže'žo benne' wnná bia' ka'. 
Byéchjgekle benne' yógo'te yež ka' neda', san ḻo La la'y che X̱anžo Dios bžia yi'a benne' ka'. 
Byéchjgekle' neda', na' bséjwgake' neda' le'jle, san ḻo La la'y che X̱anžo Dios bžia yi'a benne' ka'. 
Byéchjgekle' neda' ka žongak bzoje ka', na' gok yeḻa' ẕža'a chégake' ka to yi' da' ẕzeyen yix̱e' yeche' biž, san ḻo La la'y che X̱anžo Dios bžia yi'a benne' ka'. 
Bžíga'gake' neda' nich chejchégoa'a san gokḻen X̱anžo Dios neda'. 
Nak X̱anžo Dios ka to yo'o gan zoa chawa'a, na' góḻteza' chie' Ḻe', dan' Ḻekze' žeslé' neda'. 
Žoḻgak benne' chawe' ka' ḻo yeḻa' žebele chégake' dan' žeslá X̱anžon' ḻégake'. Ḻen yeḻa' wak ẕen žon X̱anžo Dios da' ẕente ka'. 
Ẕente nak yeḻa' wak che X̱anžo Dios. Da' ẕente ka' žon yeḻa' wak ẕen che X̱anžon'. 
Bi gata', san soa' nbana', na' wzenla' benne' ka' ka zej nak da' ka' ben X̱anžon'. 
Bsaka' zi'ḻe'e X̱anžon' neda', san bi bdie' neda' ḻo na' yeḻa' got. 
Bsaljw gan cho'ogak benách ka' yodo' che X̱anžo Dios, na' choa'a ga na', na' wká'n ẕena' X̱ana' Dios. 
Zoa nga gan žo'ožo ḻaw X̱anžo Dios, na' žo'ogak benne' chawe' ka' nga. 
Wká'n ẕena' Le', X̱ana' Dios, dan' benlo' chia', na' besló' neda' ḻo dan' goken chia'. 
Yej na' da' bzoagak benne' wen yo'o ka' cheḻa'ale, beno' Le' ga naken yej blo. 
Da' ni benkze X̱anžon', na' žonen ga žebanlžo. 
Ža ni naken ža da' ben X̱anžon'. Yebéḻe'elžo, na' soažo ḻo yeḻa' ba nez ḻo ža ni. 
X̱anto' Dios, žáta'yoela' Le' yesló' neto' na'a. Žáta'yoela' Le', X̱anto', gon chawo'o neto'. 
¡Ga'n ẕen bennen' ze'e ḻo wláz X̱anžo Dios! Ḻo liž X̱anžo Dios ẕnnablto' Ḻe' gon chawe'e ḻe'e. 
X̱anžon' nakkze' Dios, na' ba bsa'ni'e žo'o. Le wchéj biado' ka' gótele ḻawe' Ḻe' ḻawgak loz bkog la'y. 
Nako' Le' Dios chia', na' wká'n ẕena' Le'. X̱ana' Dios, žoe ḻawa' Le'. 
¡Le wká'n ẕen X̱anžo Dios dan' nake' chawe', na' dan' to chi'ize žeyache' ḻáže'le' žo'o! 
