﻿SALMOS.
119.
Ba nez ẕen naken chegak benne' ka' žóntezgake' da' naken dot da' li, benne' ka' žóntezgake' ka ẕnna da' wnná X̱anžo Dios. 
Ba nez ẕen naken chegak benne' ka' žóntezgake' ka žsedle diža' chie' žo'o, na' dot yichj ḻáẕdo'gake' žóngake' kan ẕnnan. 
Benne' ki batkle žóngake' da' ẕinnj, benne' ka' žóntezgake' ka ẕnna Dios žaḻa' góngake'. 
Le', X̱anto' Dios, bzejni'ilo' neto', nich bento' dot kan zej nak da' ka' wnnakzo' Le'. 
Žak ḻáže'ḻi'a gónteza' kakze ẕnna x̱tižo'o, 
na' batkle yedoe'ela', cha' kwi'a wnné yoe gona' ka nak da' wnnakzo' Le'. 
Ḻo yeḻa' ḻi ḻaže' chia' wká'n ẕena' Le' kate' ba bsedla' da' bchi'a ḻažo'o, da' naken chawe'. 
Gónteza' ka nak da' ka' ẕchi'lo' neto', na' batkle kwej yichjo' neda'. 
¿Nakx̱ gak gon to benne' kwide' da' naken chawe'? Žaḻa' góntezbe' ka ẕnna x̱tižo'o. 
Dot ḻaža'a žon byena' gona' da' ẕnnakzo' Le'. Bi go'o latje wzóa' cheḻa'ale dan' wnnó'. 
Ḻo yichj ḻáẕda'wa' žónteza' ka nak da' ẕnno' Le' nich bi gona' doḻa', na' bi wži'a chio' Le'. 
La'y nako' Le', X̱ana' Dios. Bsedle neda' da' ẕchi'lo' neto'. 
Ḻen žoá'akza' bzenla' benne' ka' ka nak da' bchi'a ḻažo'o. 
Žebéḻe'ežela' žónteza' ka žsedle diža' chio' neto', ka ẕbégekle benne' ka' zej nápḻi'e yeḻa' wnni'a. 
Wláb ḻaža'a ka nak da' wnnakzo' Le', na' wsedla' binlo da' ẕnno' žaḻa' gonto'. 
Yebéḻe'ela' gona' ka nak da' ži'o neto', na' bi gaḻ ḻaža'a kan ẕnna x̱tižo'o. 
Ben chawe' neda', wen žin chio', na' soa' nbana', na' gónteza' ka ẕnna x̱tižo'o. 
Bsaljw yej ḻawa' nich ḻe'ela' da' ẕente da' nyejwn ḻo da' wnnakzo' Le'. 
Naka' ka to benne' ẕdaze' ḻo yežlyó nga. Bzejní'il neda' da' ẕchi'lo' neto'. 
Žedó ḻaža'a dan' dot ḻaža'a žak ḻaža'a gónteza' da' ẕchi'a ḻažo'o. 
Ẕdiḻo' benne' ka' ẕka'n ẕen kwíngake', benne' wen da' ẕinnj ka', benne' ka' ẕzóagake' cheḻa'ale da' wnnakzo' Le'. 
Bi go'o latje no benne' nne zi'e chia', na' wka'ne' neda' ka'ze, dan' žónteza' ka žsedlo' neto'. 
Ḻezka' benne' wnná bia' ka' wnnégake' chia', san neda', wen žin chio', ẕlab ḻaža'a ka nak x̱tižo'o. 
Da' žaz ḻaža'a naken da' žsedle diža' chio' neto', na' ẕzejni'ilen neda'. 
Že' be' da' nakkza' zedle dan' zoa' gata'. Bzoa choch yichj ḻáẕda'wa' ḻen x̱tižo'o. 
Bḻoe'ela' Le' da' žona', na' bezi'o neda'. Bsedle neda' da' ẕnna x̱tižo'o. 
Bzejní'il neda' nich gak gona' da' ẕchi'lo' neto', nich wláb ḻaža'a ka zej nak da' ẕente ka' da' beno'. 
Žedó ḻaža'a dan' žak nyache' ḻaža'a. Ben choch neda' ḻen x̱tižo'o. 
Bi go'o latje gaka' benne' wen ḻaže', na' ḻo yeḻa' žeyache' ḻaže' chio' bsedle neda' da' wnnakzo' Le'. 
Ben byena' gona' da' naken dot da' li, na' ži'a wnné yoe gona' da' bchi'a ḻažo'o. 
Žónteza' ka žsedle diža' chio' neto'. X̱ana' Dios, bi go'o latje yedoe'ela'. 
Gónteza' ka zej nak da' ka' wnnakzo' Le', kate' wzejní'iželo' neda'. 
X̱ana' Dios, bsedle neda' nich gona' ka ẕnna x̱tižo'o, na' gónteza' ka naken na' zejte ža gata'. 
Bzejní'il neda', na' gónteza' da' bchi'lo' neto', na' dot ḻaža'a gona' ka ẕnnan. 
Bḻoe'el neda' nich gona' da' wnnakzo' Le', dan' žak ḻáže'kza' gona' ka naken. 
Ben ga chaz ḻaža'a gona' ka žsedle diža' chio' neto', nich bi dan ḻaža'a yeḻa' gape. 
Bi go'o latje wká'n ẕena' lo'a ka'. Ben choch yichj ḻáẕda'wa' nich gona' ka ẕnna x̱tižo'o. 
Ben ka ẕnna x̱tižo'o da' bchebe ḻažo'o chia' neda', wen žin chio', nich žeba' Le'. 
Bde cheḻa'ale da' ẕnnégake' chia', dan' ẕžeba', dan' chawe' zej nak x̱tižo'o ka'. 
Žak ḻaža'a gona' da' bchi'lo' Le' neto'. Ben choch yichj ḻáẕda'wa' ḻen da' chawe' chio'. 
Da, yeyache' ḻáže'lo' neda', X̱ana' Dios. Da, yesló' neda', ka bchebe ḻažo'o gono'. 
Žecheba' ḻaw bennen' ẕka'ne' neda' ka'ze, ẕnnia': “Žx̱en ḻaža'a x̱tižo'o, X̱ana' Dios.” 
Ben ga sóateza' wchaḻja' diža' da' li chio', dan' žx̱en ḻaža'a da' ẕchi'a ḻažo'o. 
Gónteza' kan ẕnna da' wnnakzo' Le'. To chi'ize góntezan'. 
Lakza' neda' dan' ži'a wnné yoe gónteza' da' wnnakzo' Le'. 
Wchaḻjkza' diža' chio' ḻawgak benne' wnná bia' ka', na' batkle yedoe'ela'. 
Yebéḻe'ekzla' gona' da' wnnakzo' Le', dan' nží'iḻe'elan'. 
Žechebe ḻaža'a gona' da' bchi'lo' neto', dan' nži'ila', na' wláb ḻaža'a ka ẕnna x̱tižo'o. 
Bejsá' ḻaže' da' wchebe ḻažo'o chia' neda', wen žin chio', dan' žx̱en ḻaža'an. 
Katen' wẕáka'ḻi'a, wzóa to da' beyón ẕenen neda', dan' ben choch x̱tižo'o yichj ḻáẕda'wa'. 
Benne' ka' ẕka'n ẕen kwíngake' ẕnnégake' chia', san batkle wsana' da' wnnakzo' Le'. 
Chejsá' ḻaža'a ka nak da' bchi'a ḻažo'o ža ni'te, dan' žeyón ẕenen neda', X̱ana' Dios. 
Ẕža'a neda', na že' zedla' ni'a chegak benne' ka' žóngake' da' ẕinnj, benne' ka' ẕzóagake' cheḻa'ale da' wnnakzo' Le'. 
X̱tižo'o naken to da' žoḻa' kate' ne zoa' to yežlyó da' žen' zi'to' ga zoa laža'. 
Žel chejsá' ḻaža'a La la'y chio', X̱ana' Dios, na' gónteza' ka ẕnna da' wnnakzo' Le'. 
Gaken yeḻa' ba nez ẕen chia' dan' gónteza' da' bchi'lo' Le' neto'. 
Da' ẕdan ḻaža'a nakkzo' Le', X̱ana' Dios. Wnnakza' gónteza' ka ẕnna x̱tižo'o. 
Dot ḻaža'a ẕnnabla' Le' yido' gákḻeno' neda'. Beyache' ḻaže'l neda' kan wnnakzo' gono'. 
Bwia' binlo ka zej nak da' ka' bena', na' da' yoble žona' ka žsedle diža' chio' neto'. 
Ben byena', na' bi wžeḻ-la' gónteza' ka nak da' wnnakzo' Le'. 
Do yeḻj chegak benne' wen da' ẕinnj ka' nžejen neda', san bi na' gaḻ ḻaža'a ka ẕnna da' bchi'lo' neto'. 
Žel žeyasa' na' ẕka'n ẕena' Le' dan' chawe' nak da' ẕchi'a ḻažo'o. 
Naka' toze ḻen yógo'te benne' ka' ẕžébegake' Le', benne' ka' žóntezgake' ka nak da' wnnakzo' Le'. 
X̱ana' Dios, nža' yežlyó yeḻa' žeyache' ḻaže' chio'. Bsedle neda' gona' ka ẕnna x̱tižo'o. 
Žon chawo'o neda', wen žin chio'. X̱ana' Dios, žonon' ka ẕnnakze x̱tižo'o. 
Bsedle neda' da' nak chawe' nich chejni'ilan', dan' žejḻi'a da' wnnakzo' Le'. 
Néžwte ka bzex̱jo' neda' wdía' cheḻa'ale, san na'a žónteza' ka ẕnna x̱tižo'o. 
Nako' chawe', na' ẕnno' gon chawo'o neto'. Bsedle neda' nich gona' ka ẕnna x̱tižo'o. 
Benne' ka' ẕka'n ẕen kwíngake' wnnégake' chia' da' wen ḻaže', san dot ḻaža'a gónteza' da' bchi'lo' neto'. 
Bi yo'o yeḻa' žejní'il ḻo ḻáẕdo'gak benne' ka' san neda' žaz ḻaža'a gona' da' wnnakzo' Le'. 
Chawe' nak bzex̱jo' neda', nich wsedla' gona' ka ẕnna x̱tižo'o. 
Nákḻe'eže chawe' da' bchi'lo' neda', ka zante mil mežw oro, na' plat. 
Ḻen na'kzo' beno' neda' káteze naka'. Bzejní'il neda' nich wsedla' gona' da' wnnakzo' Le'. 
Benne' ka' ẕžébegake' Le' ḻé'egekle' neda', na' yebégekle' dan' žx̱en ḻaža'a gak kan ẕnna x̱tižo'o. 
X̱ana' Dios, nnezla' nak chawe' kan ẕchi'a ḻažo'o, na' ḻo yeḻa' ḻi ḻaže' chio' bsaka' zi'o neda'. 
Na'a ḻo yeḻa' žeyache' ḻaže' chio' beyón ẕen neda' káteze nak da' bchebe ḻažo'o gono' chia' neda', wen žin chio'. 
Beyache' ḻaže'l neda' nich soa' nbana' dan' žaz ḻaža'a gona' da' wnnakzo' Le'. 
Ben ga yedoé'egekle benne' ka' ẕka'n ẕen kwíngake', dan' ẕnnégake' chia', na' bi be bena' chégake', san neda' wláb ḻaža'a ka nak da' bchi'lo' Le' neto'. 
Ben ga ḻa'gak benne' ka' ẕžébegake' Le', nich yéngekle' chia', na' wsédgekle' da' žsedle diža' chio' neto'. 
Ben ga gona' dot ḻaža'a ka ẕnna x̱tižo'o, nich batkle yedoe'ela'. 
Že' zedle be' da' nakkza' dan' ẕbeza' ža yido' yesló' neda'. Žx̱en ḻaža'a gaken kan ẕnna x̱tižo'o. 
Že' bxin yej ḻawa' dan' žénela' yenla' da' nno', na' ẕnnia': ¿Batx̱kze yeyón ẕeno' neda'? 
Ẕbiža' ka to že'e yid dan' naḻan' ḻaw yi', san bi na' gaḻ ḻaža'a gona' ka ẕnna x̱tižo'o. 
¿Balx̱ ža soa' nbana' neda', wen žin chio'? ¿Batx̱kze gono' zi' benne' ka' ẕbia ḻáže'gake' neda'? 
Benne' ka' ẕka'n ẕen kwíngake' bché'ngake' to yežw gan chejbix̱a' neda'. Batkle žóngake' ka ẕnna dan' wnnakzo' Le'. 
Yógo'te da' bchi'lo' Le' neto' naken dot da' li. Gokḻen neda' dan' ẕbia ḻáže'gake' neda', na' bi be bena' chégake'. 
Yeláte'ze bétgake' neda', san bi na' wsana' gona' da' wnnakzo' Le'. 
Ḻo yeḻa' žeyache' ḻaže' chio' ben choch yichj ḻáẕda'wa', nich gónteza' ka žsedle diža' chio' neto'. 
X̱ana' Dios, to chi'ize zoa x̱tižo'o ya'abá na'le. 
Yeḻa' ḻi ḻaže' chio' žinen chegak yógo'te kwe' benách ka'. Le' bzoa chochkzo' yežlyó, na' zoakzen. 
Ni'a che da' wnnakzo' zej nnita' yógo'te da' zej de, na' yógo'ten žóngaken žin chio'. 
Chela' bi wyáz ḻaža'a da' wnnakzo' Le' bache wnitla' ni'a che da' wẕáka'ḻi'a. 
Batkle gaḻ ḻaža'a da' bchi'lo' neto', dan' ni'a chen ba ben chocho' neda'. 
Beslá neda' dan' naka' neda' chio' Le' na' žon byena' gona' kan ẕnna x̱tižo'o. 
Benne' wen da' ẕinnj ka' bwíagake' neda' nich gak wžía yí'gake' neda', san neda' ẕlab ḻaža'a da' žsedle diža' chio' neto'. 
Ba bḻe'ekzla' ẕde chegak yógo'te da' zej de yežlyó, san da' ka' wnnakzo' Le' batkle te chégaken. 
Dios, nží'iḻe'ela' da' žsedlo' neto'. Dot ža ẕlab ḻaža'a ka ẕnnan. 
Ni'a che da' bchi'lo' neto', beno' ga žejní'ižela' ka benne' ka' ẕžá'agake' neda' dan' zóaḻenteze da' wnnakzo' neda'. 
Žejní'ižela' ka benne' ka' žsédgekle' neda' dan' ẕlab ḻaža'a da' žsedle diža' chio' neda'. 
Ba žejní'ižela' ka benne' gole ka' dan' žónteza' ka ẕnna da' bchi'lo' Le' neto'. 
Ben byena' bi be gona' da' bi nak chawe', nich gónteza' ka ẕnna x̱tižo'o. 
Bi bsana' žona' kan bchi'a ḻažo'o dan' bsedlo' Le' neda'. 
X̱tižo'o naken ka to da' ẕix̱ḻe'e ḻo žoa'a. Nakžen ẕix̱ ka nak da' ẕix̱ che bez ḻo žoa'a. 
Ni'a che da' wnnakzo' Le' naka' benne' sina'. Che ḻen bi ẕḻe'ela' chawe' yógo'te da' wen ḻaže'. 
Ka to yi' nak x̱tižo'o gan ẕda', dan' žsa'nín' nez da' ẕzá'ḻena'. 
Bzetja' La la'y chio', Dios, na' bchebe ḻaža'a gónteza' ka bchi'a ḻažo'o da' naken chawe'. 
X̱ana' Dios, ẕzáka'ḻi'a. Ben choch neda' káteze bchebe ḻažo'o gono'. 
X̱ana' Dios, žáta'yoela' Le' si'o da' žoe ḻawa' Le'. Bsedle neda' gona' ka bchi'a ḻažo'o. 
Že' zédtezla' dan' zoa' gata', na' bi na' gaḻ ḻaža'a gona' da' wnnakzo' Le'. 
Benne' wen da' ẕinnj ka' bzáljgake' do yeḻj nich senen neda', san neda' bi bsana' žona' da' bchi'lo' Le' neto'. 
Ba wžía' da' žsedle x̱tižo'o neda' nich gaken da' gápekza' to chi'ize, dan' nak x̱tižo'o da' ẕdan ḻáže'ḻi'a. 
Zoakze ḻáẕda'wa' gónteza' ka ẕnna x̱tižo'o na' zejte ža gata'. 
Bi ẕḻe'ela' chawe' benne' ka' ẕḻoé'ezele kwíngake' chawe', san nži'ila' da' wnnakzo' Le'. 
Nako' Le' ka to yo'o gan ẕga'na' chawe', na' ka to da' žape chi'in neda', dan' žx̱en ḻaža'a gaken ka ẕnna x̱tižo'o. 
Le kwas gan zoa', ḻe'e, benne' wen da' ẕinnj ka', dan' gónteza' ka bchi'le Dios chia' neto'. 
Ben choch neda' káteze ẕnna x̱tižo'o, na' soa' nbana', na' bi yedoe'ela' ni'a che dan' žx̱en ḻaža'a. 
Ben choch neda', na' la', na' chaz ḻáže'teza' x̱tižo'o. 
Blej bchochj yógo'te benne' ka' bi žóngake' kan ẕnna x̱tižo'o dan' nak yeḻa' žejní'il chégake' da' wen ḻaže'. 
Yógo'te benne' wen da' ẕinnj ka' zej nake' ka bebe ḻo yežlyó nga. Che ḻen nži'ila' da' žsedle diža' chio' neto'. 
Žẕize beḻa' žen chia' dan' ẕžeba' Le', san žapa' ba la'ne da' ẕchi'a ḻažo'o, da' naken chawe'. 
Žona' ka nak da' bchi'a ḻažo'o, da' naken chawe'. Bi wdío' neda' ḻo na'gak benne' ka' žsaka' zí'gake' neda'. 
Bchebe ḻažo'o chia' gon chawo'o neda'. Bi go'o latje benne' ka' ẕka'n ẕen kwíngake' wsaka' zí'gake' neda'. 
Gok yej ḻawa' dan' ẕbeza' yido' yesló' neda', na' wchi'a ḻažo'o neto' kan ẕnna x̱tižo'o. 
Ḻo yeḻa' žeyache' ḻaže' chio' ben chawe' neda', wen žin chio', na' bsedle neda' gona' ka ẕnna x̱tižo'o. 
Bzejní'il neda', wen žin chio', nich gónbi'a da' žsedle diža' chio' neto'. 
X̱ana' Dios, ba bžin ža bi da' gono', dan' bzóagake' cheḻa'ale da' wnnakzo' Le'. 
Che ḻen neda' nží'ižela' da' bchi'lo' neto', ka ya oro, na' ka da' záka'že ka ya oron'. 
Che ḻen žekla' záka'že da' wnnó' ka yógo'te da' de, na' bi ẕḻe'ela' chawe' yógo'te da' zej naken da' wen laže'. 
Žebanlto' ka žsedle diža' chio' neto'. Che ḻen dot ḻaža'a žónteza' ka ẕnnan. 
Kate' no benne' bi gak chejni'ile' x̱tižo'o, x̱tižo'o na'kze žsa'nín' ḻe'. Ẕzejni'ilen benne' gax̱jw ḻaže' ka'. 
Wsalja' žoa'a, na' kwez ḻaža'a dan' žak ḻaža'a gónbi'a da' wnnakzo' Le'. 
Bwia neda', na' beyache' ḻaže'l neda', kan žóntezo' chegak benne' ka' zej nži'ile' Le'. 
Ben ga gónteza' ka ẕnna x̱tižo'o, na' bi go'o latje da' ẕinnj nna bian' neda'. 
Beslá neda' ḻo na'gak benne' yichj ža'a ka', na' gónteza' ka nak da' bchi'lo' neto'. 
Ben chawe' neda', wen žin chio', na' bsedle neda' gona' ka ẕnna x̱tižo'o. 
Nis wžeža' goken ka to yegw nis dan' bi žongak benne' ka' da' wnnakzo' Le'. 
X̱ana' Dios, chawe' nako' Le', na' ḻi ḻaže' nak ka ẕchi'a ḻažo'o neto'. 
Da' žsedle diža' chio' neto', dan' bdion' ḻo na'to', naken da' li, na' ḻi ḻaže'. 
Žedó ḻaža'a dan' žé'ḻi'a wnné yoe dan' goḻ ḻáže'gak benne' ka' bi ẕḻé'egekle' neda' chawe' ka ẕnna x̱tižo'o. 
Dot da' li nak x̱tižo'o, na' neda', wen žin chio', nži'ilan'. 
Naka' gax̱jw ḻaže', na' ẕzóagake' neda' cheḻa'ale, san bi na' gaḻ ḻaža'a da' wnnakzo' Le'. 
To chi'ize zoa da' ẕchi'a ḻažo'o, na' da' li nak da' bchi'lo' neto'. 
Da' ẕzáka'ḻi'a, na' da' zede zej nox̱en neda', san žaz ḻaža'a da' wnnakzo' Le'. 
To chi'ize nak ḻi ḻaže' da' žsedle diža' chio' neto'. Bzejní'il neda', na' soa' nbana'. 
Dot ḻaža'a žḻiža' Le', X̱ana' Dios. Ben chawe' neda', na' gónteza' ka ẕnna x̱tižo'o. 
Žḻiža' Le'. Gokḻen neda', na' gónteza' ka žsedle diža' chio' neto'. 
Žasa' néžwte ka ža'ní', na' žḻiža' Le'. Žx̱en ḻaža'a gak kan ẕnna x̱tižo'o. 
Kate' ba goḻe, ẕbeja' yele yej ḻawa', nich wláb ḻaža'a ka nak da' wnnakzo' Le'. 
Ḻo yeḻa' žeyache' ḻaže' chio' benle chi'a. X̱ana' Dios, ka nak da' bchi'a ḻažo'o ben choch neda'. 
Benne' ka' ẕbia ḻáže'gake' neda' zej nnita' góngake' chia' da' ẕinnj. Bsángake' da' ka' bchi'lo' neto'. 
X̱ana' Dios, zo' Le' gawze gan zoa'. Yógo'te da' wnnakzo' naken dot da' li. 
Ža ni'te ba nónbi'a da' žsedle diža' chio' neto', dan' bzo' cheto' to chi'ize. 
Bwia binlo ka ẕzáka'ḻi'a, na' beslá neda', dan' bi na' gaḻ ḻaža'a da' wnnakzo' Le'. 
Bechebe ḻo wlaza' neda', na' beya'w neda'. Ben choch neda' ḻen x̱tižo'o. 
Zedḻe'e gak lagak benne' ka' žebéj yíchjgake' Le', dan' bi ẕbé'gake' wnné yoe góngake' ka ẕnna x̱tižo'o. 
X̱ana' Dios, žeyache' ḻáže'ḻe'elo' benách chio' ka'. Ben choch neda' ka ẕnnakze x̱tižo'o gono'. 
Zanḻe'e zej nak benne' ka' ẕbia ḻáže'gake' neda', na' benne' ka' bi ẕḻé'egekle' neda' chawe', san bi na' wsana' žona' ka žsedle diža' chio' neto'. 
Bi ẕḻe'ela' chawe' benne' ka' žebéj yíchjgake' Le', benne' ka' bi žóngake' ka ẕnna x̱tižo'o. 
Bwia nga, X̱ana' Dios, ka nži'ila' da' bchi'lo' neto'. Ḻo yeḻa' žeyache' ḻaže' chio', ben choch neda'. 
Dot da' li nak x̱tižo'o, na' to chi'ize zoa da' ẕchi'a ḻažo'o Le'. 
Benne' wnná bia' ka' ẕbia ḻáže'gake' neda', na' bi be bena' chégake', san dot ḻaža'a žapa' x̱tižo'o ba la'ne. 
Žebéḻe'ežela' ḻo da' ẕnna x̱tižo'o ka žebele bennen' žežeḻ-le' to yeḻa' wnni'a ẕente. 
Bi ẕḻe'ela' chawe', na' bi ẕzi'a da' wen ḻaže', san nži'ila' da' bsedlo' neto'. 
Tža tža žoe ḻawa' Le' dan' nak chawe' ka ẕchi'a ḻažo'o neto'. 
Ẕga'n cháwe'gac benne' ka' zej nži'ile' da' žsedlo', na' bi be de da' gonen ga chejchégwgake'. 
X̱ana' Dios, ẕbeza' Le' yido' yesló' neda', na' žónteza' ka nak da' wnnakzo' Le'. 
Dot ḻaža'a žónteza' da' žsedle diža' chio' neto', na' nží'iḻe'ela' da' ẕnnan. 
Žónteza' ka ẕnna da' bchi'lo' neto', na' ka žsedle diža' chio' neto', na' ẕḻé'ekzlo' yógo'te da' žona'. 
X̱ana' Dios, benle da' žḻiža' Le'. Bzejní'il neda' ka ẕnna x̱tižo'o gono'. 
Benle da' ẕnnaba' ḻawo' Le'. Beslá neda' ka bchebe ḻažo'o gono'. 
We ḻáwteza' Le', X̱ana' Dios, dan' bsedlo' neda' gona' ka ẕnna x̱tižo'o. 
Wcháḻjteza' ka nak x̱tižo'o dan' chawe' nak da' bchi'lo' neto'. 
Wzóateze gákḻeno' neda' dan' žon byena' gona' ka ẕnna da' wnnakzo' Le'. 
Žak ḻaža'a yesló' neda', X̱ana' Dios. Žaz ḻaža'a da' bsedlo' neto'. 
Ben ga soa' nbana', na' wká'n ẕena' Le', na' da' ẕchi'a ḻažo'o gákḻenen neda'. 
Ẕdía' cheḻa'ale kan ẕda to ẕila' nnitlba'. Beyílj neda', wen žin chio', dan' bi na' gaḻ ḻaža'a da' ka' bchi'lo' neto'. 
