﻿SALMOS.
126.
Kate' X̱anžo Dios beslé' žo'o ḻo na'gak benne' zi'to' ka', na' begoé'e žo'o ḻo yež Sión, gókežo zoažo bichgale. 
Naž bẕížežo, na' be ḻawžo X̱anžo Dios. Naž wnnagak benne' zi'to' ka': “Da' ẕente ben Dios, X̱angak benne' ka', chégake'.” 
Da' likze, ẕenḻe'e nak da' ben X̱anžo Dios chežo žo'o. Žak chežo yeḻa' ba nez ẕen. 
Beslá X̱anžon' žo'o ḻo na'gak benne' zi'to' ka'. Naž bežinžo ḻo yežlyó chežo, kan žežín nis wba'w ḻo yegw biž ka'. 
Benne' ka' ẕbéžegake' kate' žázgake', ḻo yeḻa' žebele chégake' yezí'gake' linne. 
Bennen' ẕbeže' kate' zeje' zjeze' binne cháwe'do' ka', ḻo yeḻa' žebele yežine' zedjnoé'e linne chien'. 
