﻿SALMOS.
136.
¡Le wká'n ẕen X̱anžo Dios, Benne' chawen'! Zóateze yeḻa' žeyache' ḻaže' chie'. 
¡Le wká'n ẕen Dios, Bennen' nákḻe'eže' ẕen ka zej nak dios chegak benne' zi'to' ka'! Zóateze yeḻa' žeyache' ḻaže' chie'. 
¡Le wká'n ẕen X̱anžon', dan' nákḻe'eže' ẕen ka zej nak x̱angak benne' zi'to' ka'! Zóateze yeḻa' žeyache' ḻaže' chie'. 
¡Le wká'n ẕen toze' Ḻe' dan' žone' yeḻa' wak ẕen ka'! Zóateze yeḻa' žeyache' ḻaže' chie'. 
¡Le wká'n ẕen Ḻe', dan' benkze' ya'abá ḻen yeḻa' žejní'il chie'! Zóateze yeḻa' žeyache' ḻaže' chie'. 
¡Le wká'n ẕen Dios, Bennen' bzoe' yežlyó ḻawle nisdo'! Zóateze yeḻa' žeyache' ḻaže' chie'. 
¡Le wká'n ẕen Dios, Bennen' bene' wbíž, na' byo'! Zóateze yeḻa' žeyache' ḻaže' chie'. 
Bene' Ḻe' wbíž nich wsa'nín' te ža. Zóateze yeḻa' žeyache' ḻaže' chie'. 
Bene' byo', na' belj ka' nich wsa'ní'gaken žel. Zóateze yeḻa' žeyache' ḻaže' chie'. 
¡Le wká'n ẕen Dios, Bennen' bete' bi' byo nežw ka' chegak benne' Egipto ka'! Zóateze yeḻa' žeyache' ḻaže' chie'. 
¡Le wká'n ẕen Dios, Bennen' bebeje' benne' Israel ka' ḻo yežlyó Egipton'! Zóateze yeḻa' žeyache' ḻaže' chie'. 
Bchi'e ḻégake' ḻen yeḻa' wak ẕen chie'. Zóateze yeḻa' žeyache' ḻaže' chie'. 
¡Le wká'n ẕen Dios, Bennen' ben chople' Nisdo' X̱na! Zóateze yeḻa' žeyache' ḻaže' chie'. 
Bene' ga bdegak benne' Israel ka' gachj ḻawle nisdon'. Zóateze yeḻa' žeyache' ḻaže' chie'. 
San bene' ga bkache' nisdon' Faraón, benne' wnná bi'e benne' Egipto ka', benne' ka' žjake' ḻo wdiḻe. Zóateze yeḻa' žeyache' ḻaže' chie'. 
¡Le wká'n ẕen Dios, Bennen' bchi'e benne' chie' ka' ladjw latje dach! Zóateze yeḻa' žeyache' ḻaže' chie'. 
¡Le wká'n ẕen Dios, Bennen' bete' benne' wnná bia' ka'! Zóateze yeḻa' žeyache' ḻaže' chie'. 
Bete' benne' wnná bia' waḻe ka'. Zóateze yeḻa' žeyache' ḻaže' chie'. 
Bete' Sehón, bennen' wnná bi'e benne' amorreo ka'. Zóateze yeḻa' žeyache' ḻaže' chie'. 
Bete' Og, bennen' wnná bi'e benne' yež Basán ka'. Zóateze yeḻa' žeyache' ḻaže' chie'. 
Bdie' yežlyó chegak benne' ka' ḻo na'gak benne' chie' ka'. Zóateze yeḻa' žeyache' ḻaže' chie'. 
Bneẕjwen' chegak benne' Israel ka', benne' wen žin chie' ka'. Zóateze yeḻa' žeyache' ḻaže' chie'. 
Žejsá' ḻaže'e žo'o kate' ẕdíḻ-ḻengak benne' ka' žo'o. Zóateze yeḻa' žeyache' ḻaže' chie'. 
Beslé' žo'o ḻo na'gak benne' ka' bzéx̱jwgake' žo'o. Zóateze yeḻa' žeyache' ḻaže' chie'. 
Ẕwawe' yógo'te da' zej zoan nbángaken. Zóateze yeḻa' žeyache' ḻaže' chie'. 
¡Le wká'n ẕen Dios che ya'abá! Zóateze yeḻa' žeyache' ḻaže' chie'. 
