﻿SALMOS.
137.
Žoa'a yegw da' ẕden ḻo yežlyó Babilonia, wže'žo ga na', na' wžeẕžo katen' bejsá' ḻáže'žo che yež Sión. 
Ḻo ni'a na' yag labada' žoa'a yegon' bgáḻa'žo da' ka' ẕgoḻžo. 
Benne' ka' bché'gake' žo'o ka benne' zej ndo'w ka' wnnábgekle' žo'o goḻžo. Benne' ka' bchínnjgake' yež chežo góžgake' žo'o yebelžo, na' wnnágake': “Le goḻ cheto' da' ka' beḻ-le ḻo yež Sión.” 
¿Nakx̱kze gak goḻžo da' wká'n ẕenžo X̱anžo Dios, ga zoato' ḻo yežlyó ni chegak benne' zi'to' ka'? 
Cha' gaḻ ḻaža'a yež Jerusalén, ẕnnabla' Dios gone' ga wnít na'a ḻi ža yeḻa' waḻ chen. 
Ẕnnabla'-ne' gone' ga ta' loža'a chichjla' cha' bi chejsá' ḻaža'a che yež Jerusalén, na' cha' bi wká'n ẕenan'. Yežen' naken da' žaz ḻáže'ḻi'a. 
X̱ana' Dios, bejsá' ḻaže' da' ẕinnj da' bengak benne' Edom ka' ḻo ža katen' bchínnjgake' yež Jerusalén, na' wnnágake': “¡Le wchinnjen! ¡Le wchinnjen, na' zejte ḻo lenen!” 
Ḻe'e, benne' Babilonia ka', kwia yi'le. Ba nez ẕen gaken che bennen' gone' chele kan benle ḻe'e cheto' neto'. 
Ba nez ẕen gaken che bennen' ke'e x̱kwide' chele ka' na' wzoẕje' ḻégakbe' ḻo yej x̱e. 
