﻿SALMOS.
138.
X̱ana' Dios, dot ḻaža'a we ḻawa' Le'. Žóḻteza' da' žoe ḻawa' Le' ḻawgak dios ka' chegak benne' zi'to' ka'. 
Ẕzoa ẕiba' ḻo yodo' la'y chio', na' ẕka'n ẕena' La la'y chio' dan' nako' ḻi ḻaže', na' žeyache' ḻáže'lo' benne' chio' ka', na' dan' bḻoe'elo' ḻaw nako' Benne' ẕente, na' ẕente nak x̱tižo'o. 
Kate' bḻiža' Le', na' gókḻeno' neda'. Ḻen yeḻa' wak chio' ben chocho' neda'. 
Yógo'te benne' wnná bia' ka' nníta'gake' yežlyó nga we ḻáwgake' Le', X̱ana' Dios, dan' ba béngekle' da' ẕnna x̱tižo'o. 
Góḻgake' che da' ben X̱anžo Dios, dan' ẕente nak yeḻa' ẕen che X̱anžon'. 
Ẕente nak X̱anžo Dios, na' žákḻene' benne' gax̱jw ḻaže' ka', san bi žwi'e latje benne' ẕka'n ẕen kwine' žine' ḻawe' Ḻe'. 
Kate' že' zedla', Le' žon chocho' neda'. Ẕlago' benne' ka' bi ẕḻé'egekle' neda' chawe', na' ḻen yeḻa' wak chio' žesló' neda'. 
Gon X̱anžo Dios da' wchebe ḻaže'e chia'. X̱ana' Dios, žeyache' ḻáže'tezlo' benne' chio' ka'. Bi wsano' žono' žin da' wzó ḻawo' žonon'. 
