﻿SALMOS.
139.
X̱ana' Dios, ba bwíakzo' neda' na' binlo nónbi'o neda'. 
Nnézkzelo' kate' ži'a, na' kate' ẕzo ža'a. Zíto'le nnézkzelo' da' yo'o yichj ḻáẕda'wa'. 
Ẕwíakzo' da' žona', na' da' žezá' ḻaža'a. Nnézkzelo' yógo'te da' žona'. 
Kate' bi na' wchaḻja', ba nnézkzelo' Le', X̱ana' Dios, yógo'te da' nnia'. 
Gáte'tezle kwita' neda' zoakzo' Le', X̱ana' Dios, na' no'o žon chochen neda'. 
Dan' ẕente nak da' nnezlo' Le' žonen ga žebanla'. Nakḻe'en sina', na' bi gak chejni'ilan'. 
¿Gaẕ gak cha'a zi'to' gan bi zoakze Be' La'y chio'? ¿Gaẕ gak wẕonnja' gan bi zoakzo' Le'? 
Cha' kwena' sibe ẕan ya'abá, zoakzo' Le' ga na'. Cha' yetja' ḻo da' gže' che yežlyó, zo' Le' ga na'. 
Chela' sáke'la' tia' ḻo be', na' cha'a zi'to' gan ẕḻa' wbíž, o tia' yecheḻa'ale nisdo' gan žen wbíž, 
ḻezka' sóaḻeno' neda' ga na', na' no'o ḻi ža gon chochen neda'. 
Chela' gak gona' ga wkache' da' choḻ neda', o gona' ga yeyák choḻ baní' da' nyechjlen neda', 
da' choḻ na' bi gak wkachen' neda' ḻawo' Le', na' yel yeyaken ka te ža ḻawo' Le'. Lébeze ka zej nak da' choḻ, na' yeḻa' baní' ḻawo' Le'. 
Le' beno' da' ka' zej yo'on ḻo beḻa' žen chia'. Le' bzo'o neda' ḻo ḻe'e x̱na'a. 
Wká'n ẕenkza' Le' dan' ẕente nak da' žono', na' žebanla' ka naken. Dot ḻaža'a nnézkzela' naken ki. 
Bḻe'ekzlo' neda' kate' wyá'a žit yoa'a, katen' wzóa' ḻo ḻe'e x̱na'a, katen' bgola' ḻo da' bagáche'ze ga na'. 
Bḻe'elo' beḻa' žen chia' kate' wyá'n. Yógo'te da' ki bzojon' ḻe'e yiche chio', na' wdé na' wyá'n, na' yógo'ten gókgaken kan zej nyejwn. 
X̱ana' Dios, ẕente zej nak da' žezá' ḻažo'o gono'. Da' zante zej naken. 
Cha' gak ḻaža'a wlaba' ka zej naken, zej nyanen ka yož dan' žen' žoa'a yegw ẕen. Kate' žebana', na' zóaḻenkza' Le'. 
X̱ana' Dios, da' likze goto' benne' wen da' ẕinnj ka'. Che ḻen le kwas gan zoa', ḻe'e, benne' wet benách ka'. 
Ẕnnégake' chio' Le', Dios. Benne' ka' bi ẕḻé'egekle' Le' chawe' ẕzétjgake' dáche'ze La la'y chio'. 
X̱ana' Dios, bi ẕḻe'ela' chawe' benne' ka' ẕzóagake' Le' cheḻa'ale, na' ẕžá'aḻi'a benne' ka' ẕží'igake' chio' Le'. 
Dot ḻaža'a bi ẕḻe'ela' chawe' benne' ka'. Žekla' ẕži'igak benne' ka' chekza' neda'. 
Bwíakze neda', X̱ana' Dios, na' bwia da' yo'on yichj ḻáẕda'wa'. Bwia neda' nich nnezlo' da' ẕza' ḻaža'a. 
Bwia cha' zoaḻen to da' ẕinnj neda'. Bzoa neda' ḻo nez chawe' chio' dan' zoan to chi'ize. 
