﻿SALMOS.
140.
X̱ana' Dios, beslá neda' ḻo na'gak benne' wen da' ẕinnj ka' nich bi gongak benne' yichj ža'a ka' neda' ẕia. 
Benne' ki žíljgake' da' ẕinnj da' góngake'. Tža tža ẕdíḻ-ḻengake' benách ka'. 
Da' ẕnnágake' naken ka laye' bele da' zej ntochen'. X̱tíža'gak benne' ka' zej naken ka nis snia che bele. 
X̱ana' Dios, bi go'o latje benne' wen da' ẕinnj ka' góngake' chia' da' ẕinnj. Beslá neda' ḻo na'gak benne' yichj ža'a ka', benne' ka' žon byéngake' chejchégoa'a. 
Benne' ka' ẕka'n ẕen kwíngake' wlékgake' to da' senen neda'. Bzáḻjgake' do yeḻj žoa'a nez. Wlékgake' da' ka' séngaken neda'. 
Goža' X̱ana' Dios: “Le' nako' Dios chia'. X̱ana' Dios, benle chi'a kate' žḻiža' Le'. 
X̱ana' Dios, nakkzo' Benne' weslá chia'. Le' wdape chi'o yichja' ḻo ža gok wdiḻe. 
X̱ana' Dios, bi go'o latje gak kan žak ḻáže'gak benne' wen da' ẕinnj ka'. Bi go'o ḻégake' latje góngake' da' ẕza' ḻáže'gake' nich bi wká'n ẕen kwíngake'. 
Zej nyechjle benne' wen da' ẕinnj ka' neda'. Ben ga gak chegak benne' ka' kan žénegekle' góngake' chegak benne' yoble ka'. 
Ben ga yex̱jw yi' ḻo yichjgak benne' ka'. Ben ga chejchazgak benne' ka' ḻo yin'. Ben ga chejchazgake' ḻo da' gže'ḻe'e gan batkle yežójgake'. 
Bi go'o latje bennen' ẕnne zi'e ga'ne' ḻo yežlyó. Ben zi' benne' yichj ža'a, dan' wžía yin' ḻe'.” 
Nnezla' yechebe X̱anžo Dios che no benne' gax̱jw ḻaže', na' wzóa choche' da' ka' zej yo'on ḻo na'gak benne' yache' ka'. 
Da' likze benne' chawe' ka' we ḻáwgake' La la'y chio', na' benne' ḻi ḻaže' ka' sóagake' gan zo' Le'. 
