﻿SALMOS.
142.
Neda' ẕnnia' zižje, žḻiža' X̱anžo Dios. Dot ḻaža'a ẕnnabla' X̱anžon' yeyache' ḻáže'le' neda'. 
Ḻawo' Le' žawa' ẕia che da' žak chia'. Ḻawo' Le' ẕḻoe'ela' že' zedla' neda'. 
Kate' že' ḻáẕda'wa' zedḻe'e, Le', X̱ana' Dios, nnezlo' da' žaken chia'. Wlékgake' to do yeḻj ḻo x̱neza', nich senen neda'. 
Ẕwia' kwitla', san bi zoa no benne' gákḻene' neda'. Bi zoa no benne' gape chi'ikze' neda'. Bi zoa no benne' kwi'e wnné yoe chia' neda'. 
Žḻiža' Le', X̱ana' Dios, ẕnnia': “Žx̱en ḻaža'a tozo' Le'. Tozo' Le' žaz ḻaža'a ḻo yežlyó nga. 
Benle da' žḻiža' Le', dan' ẕzáka'ḻi'a. Beslá neda' ḻo na'gak benne' ka' ẕbia ḻáže'gake' neda', na' zej nakže' waḻe ka neda'. 
Bebéj neda' ḻo da' žaken chia' nich gak we ḻawa' Le'. Benne' chawe' ka' chéchjgeke' neda' kate' gon chawo'o neda'.” 
