﻿SALMOS.
143.
X̱ana' Dios, benle da' ẕnnia' ḻawo' Le'. Bze nag da' ẕnnabla' Le'. Da gákḻeno' neda' dan' nako' ḻi ḻaže', na' chawe'. 
Bi wchi'a ḻažo'o neda', wen žin chio', ka nak da' nbaga'a, dan' ḻawo' Le' bi zoa no benne' nake' dot ḻi ḻaže'. 
Gokḻen neda' dan' benne' ka' ẕžá'agake' neda' ẕbia ḻáže'gake' neda'. Yeláte'ze ka bétgake' neda'. Béngake' ga naka' ka to benne' ẕde' ḻo da' choḻ kan žak chegak benne' gat ka'. 
Že' ḻáẕda'wa' zedḻe'e, na' žak nyache' ḻáže'ḻi'a. 
Žejsá' ḻaža'a kan gok ža ni'te. Ẕlab ḻaža'a ka nak yógo'te da' beno'. Žejsá' ḻaža'a ka nak da' ẕente da' beno'. 
Ẕchis na'a ḻawo' Le'. Naka' ka to yežlyó biž, ẕbiḻa' Le'. 
Da ka' gaze gákḻeno' neda', X̱ana' Dios. Dan' žedó ḻaža'a bi žel-lo' gákḻeno' neda' nich bi gaka' ka to benne' yoe'e yežw ba. 
Zildo' ben ga chejsá' ḻaža'a žeyache' ḻáže'lo' benách chio' ka' dan' žx̱en ḻáže'kza' Le'. Bzejní'il neda' ka žaḻa' gona' dan' žak ḻaža'a gona' da' žaz ḻažo'o Le'. 
X̱ana' Dios, beslá neda' ḻo na'gak benne' ka' ẕžá'agake' neda'. Ẕzoa kwina' ḻo no'o nich gape chi'ikzo' neda'. 
Bsedle neda' nich gona' da' žaz ḻažo'o Le', dan' nako' Le' Dios chia'. Bseḻa' Be' La'y chawe' chio' nich chi'e neda' ḻo nez chawe' chio'. 
Nich gak bian' nako' chawe', X̱ana' Dios, ben choch neda'. Dan' nako' chawe', yesló' neda' ḻo da' žak chia'. 
Dan' nako' ḻi ḻaže', wžía yi'o benne' ka' ẕžá'agake' neda'. Wžía yi'o benne' ka' žénegekle' wžía yí'gake' neda' dan' naka' neda' wen žin chio'. 
