﻿SALMOS.
144.
¡Ga'n ẕen X̱anžo Dios, Bennen' ẕzoa choche' neda'! Ḻekze' žon choche' na'a nich gak cha'a ḻo wdiḻe. Žon choche' x̱ben na'a nich tíḻ-ḻena' benne' wen da' ẕinnj ka'. 
Ḻekze' žeyache' ḻáže'le' neda', na' nake' ka to yo'o gan že' chawa'a. Žon choche' neda', na' žeslé' neda'. Žape chi'e neda', na' žx̱en ḻaža'a Ḻe'. Žone' ga žongak benne' chia' ka' da' žapa' ḻégake'. 
X̱ana' Dios, ¿biẕkze zej nak benne' ka', dan' žejsá' ḻažo'o chégake'? ¿Biẕ zej nak benne' ka' dan' ži'o wnné yoe chégake'? 
Zej nak benne' ka' ka to da' ẕnitlen. Zej nak ža chégake' ka to ẕoḻ dan' ẕdezen. 
X̱ana' Dios, bsaljw ẕan ya'abá. Betj gákḻeno' neda'. Bta ya'a ẕen ka', na' žoj žen che yi'. 
Bzaḻa' yes wzió' ka', na' bsejw x̱nezgak benne' wen da' ẕinnj ka'. Bse yag ntóche'do' chio' ka', na' bžia yi'-gake'. 
Gan zo' na'le, bze no'o, na' beslá neda' ḻo da' zedḻe'e gan ži'a. Beslá neda' ḻo na'gak benne' zi'to' ka'. 
Benne' ka' ẕnnátezegake' da' wen ḻaže', na' ẕzétjgake' Dios katen' žon ḻáže'gake'. 
X̱ana' Dios, goḻkza' chio' to da' kob, na' wgoḻa' da' žóḻ-ḻento'. Ḻen da' žóḻ-ḻento' da' nwan' chi do goḻkza' chio'. 
Žonkzo' Le' ga žežojgak chawe' benne' wnná bia' ka'. Besló' Dabí, benne' wen žin chio', ḻo ya ntoche' ka' chegak benne' wen da' ẕinnj ka'. 
Beslá neda' ḻo na'gak benne' zi'to' ka'. Benne' ka' ẕnnátezegake' da' wen ḻaže', na' ẕzétjgake' Dios katen' žon ḻáže'gake'. 
Ben ga gólegak bi' byo cheto' ka' kan ẕgólegak yag ka' ḻo yo bebe. Ben ga gakgak bi' no'le cheto' ka' ka zej nak yag x̱tanḻe'e ka' nníta'gaken ḻi'a che to yo'o ẕen. 
Ben ga cha'gak ližto' ka' yógo'te kwe' linne cheto'. Ben ga chanḻe'e bia yix̱e' cheto' ka', nich gakgak bia yíx̱e'do' zanḻe'e ḻo yežlyó cheto'. 
Ben ga gakgak beže cheto' ka' bia waḻe ka' nich gónḻe'egakba' žin. Ben ga bi wsángakba' bia že'ndo' ka' kate' bi na' žin byo' chégakba'. Ben ga bi soa no benne' kweže nyache'e ḻo yež cheto'. 
Ba nez ẕen naken chegak benne' ka' žaken ki chégake'. Ba nez ẕen naken chegak benne' ka' X̱anžon' nake' Dios chégake'. 
