﻿SALMOS.
145.
Wká'n ẕena' Le', Dios chia'. Nako' Le' Benne' Wnná Bia' Ẕen chia'. Wká'n ẕénteza' La la'y chio' to chi'ize. 
Tža tža wká'n ẕena' Le'. Wká'n ẕénteza' La la'y chio' to chi'ize. 
Ẕente nak X̱anžo Dios, na' nak chie' we ḻáwtezežo Ḻe'. Batkle gak gónbia'žo ka ẕente nake'. 
Yógo'te kwe' benne' chio' ka' yéngekle' da' beno' Le' na' wzéngekle' yezika' benách ka nak da' ẕente na'. 
Wláb ḻaža'a ka nak yeḻa' ẕen che yeḻa' wak chio', na' ka nak da' ẕente ka' da' beno'. 
Yógo'te benne' ka' wcháljgake' ka nak yeḻa' wak che da' ẕente da' beno', na' neda' wzenla' ḻégake' ka nak yeḻa' ẕen chio'. 
Wzéngekle' ljéžgake' ka' ka nak yeḻa' ži'i ḻaže' ẕen chio', na' góḻtezegake' kan nako' Le' chawe'. 
X̱anžo Dios nake' ži'i ḻaže', na' žeyache' ḻáže'le' benne' chie' ka'. Nake' ẕen ḻaže', na' žeyache' ḻáže'ḻe'ele' žo'o. 
X̱anžo Dios žon chawe'e yógo'te benne' ka', na' žeyache' ḻáže'le' yógo'te da' zóagaken nbángaken, da' ka' bene' Ḻe'. 
Yógo'te da' ka' beno' wká'n ẕéngaken Le', X̱anto' Dios na' benne' chio' ka' we ḻáwgake' Le'. 
Ẕcháḻjgake' ka ẕente nak yeḻa' wnná bia' chio'. Ẕcháḻjgake' ka nak yeḻa' wak ẕente chio' 
nich wzéngekle' yógo'te benne' ka' ka zej nak da' ẕente ka' da' beno', na' ka nak yeḻa' ẕen che yeḻa' wnná bia' chio'. 
Yeḻa' wnná bia' chion' sóatezen, na' nna bi'o yógo'te kwe' benách ka'. 
Nox̱w X̱anžo Dios yógo'te benne' ka' žejchégwgake'. Žechise' yógo'te benne' ka' zej ndo'e ḻo žin waḻe. 
Yógo'te benne' ka' ẕbézgake' Le' gákḻeno' ḻégake', na' Le' wneẕjo' da' gáwgake' kate' gaḻa' chen. 
Ḻo yeḻa' ži'i ḻaže' chio' ẕze no'o. Ẕneẕjo' da' žiážjegekle yógo'te da' zóagaken nbángaken. 
Chawe' nak X̱anžo Dios ḻo yógo'te da' žone', na' ḻi ḻaže' zej nak yógo'te da' žone' Ḻe'. 
X̱anžo Dios zóateze' gákḻene' yógo'te benne' ka' žḻížgake' Ḻe', yógo'te benne' gax̱jw ḻaže' ka' žḻížgake' Ḻe'. 
Gone' da' žak ḻáže'gak benne' ka' ẕžébegake' Ḻe'. Ḻezka' yenle' chégake' kate' wḻížgake' Ḻe', na' yeslé' ḻégake'. 
X̱anžo Dios žape chi'ikze' yógo'te benne' ka' zej nži'ile' Ḻe', san wžía yi'e yógo'te benne' ka' ẕbej yíchjgake' Ḻe'. 
Dot ḻaža'a wká'n ẕena' X̱anžo Dios. Yógo'te benne' ka' žaḻa' we ḻáwgake' La la'y chie' to chi'ize. 
