﻿SALMOS.
146.
¡Ga'n ẕen X̱anžo Dios! Dot ḻaža'a žoe ḻawa' X̱anžo Dios. 
X̱ak zoa' nbana' wká'n ẕena' X̱anžo Dios. Góḻteza' da' we ḻawa' X̱anžo Dios x̱ak zoa' nbana'. 
Bi wx̱én ḻáže'le benne' wnná bia' ka', na' bi wx̱én ḻáže'le benne' waḻe ka', dan' bi gak yeslágake' ḻe'e. 
Žežój be' zej yoe'e, na' yeyákgake' bix̱te yo. Ḻo ža na'kze nitle da' gok ḻáže'gake' góngake'. 
Ba nez ẕen naken che bennen', žakḻen Dios che Jakob ḻe', bennen' žx̱en ḻaže'e X̱anžo Dios. 
Dios na'kze bene' ya'abá, na' yežlyó, na' nisdo', na' yógo'te da' ka' zej nnitan' latje ka'. Nake' Bennen' žónteze' da' ḻi ḻaže'. 
Ẕchi'a ḻaže'e benne' nyache' ḻaže' ka', na' ẕwawe' benne' ka' ẕdóngake'. X̱anžo Dios žeslé' benne' ndo'w ka'. 
X̱anžo Dios žeyone' yej ḻawgak benne' ḻo choḻ ka'. X̱anžo Dios žechise' benne' ka' žejchégwgake'. X̱anžo Dios nži'ile' benne' chawe' ka'. 
X̱anžo Dios žape chi'e benne' zi'to' ka'. Žákḻene' bi' wzebe ka', na' no'le wzebe ka', san ẕchinnje' da' žongak benne' wen da' ẕinnj ka'. 
Ḻe'e, benne' yež Sión, ẕnna bia'kze X̱anžo Dios. Ẕnna biá'teze Dios to chi'ize. ¡Ga'n ẕen X̱anžo Dios! 
